पुणे : राज्यात विधानपरिषदेच्या १७ जागांवर निवडणुका होत आहेत. या निवडणुकीसाठी सर्व राजकीय पक्षांनी कंबर कसली आहे. भाजपने काल ११ उमेदवारांची यादी जाहीर केली. त्यानंतर आज सोमवारी सुनेत्रा पवारांच्या राष्ट्रवादी काँग्रेसनेही उमेदवार जाहीर केलेत. परंतु महायुतीमधील घटक पक्ष असलेल्या सुनेत्रा पवारांच्या राष्ट्रवादीत पुण्यातील विधानपरिषदेच्या जागेवरून हायव्होल्टेज ड्रामा पाहायला मिळाला. पुण्यातील जागेवर भाजपमधून राष्ट्रवादीत आलेल्या विक्रम काकडे यांना उमेदवारी देण्यात आली. या उमेवदारीवरून नाराज होत राष्ट्रवादी काँग्रेसच्या बड्या नेत्याने राजीनामा दिला.

पुण्यात विधानपरिषदेच्या उमेवदारीवरून नाराजीनाट्य पाहायला मिळत आहे. पुण्यात विधानपरिषदेच्या उमेदवारीसाठी माजी राज्यसभा खासदार संजय काकडे आणि विक्रम काकडे यांनी राष्ट्रवादीत प्रवेश केला. सुनेत्रा पवारांच्या राष्ट्रवादीत प्रवेश केलेल्या विक्रम काकडे यांना सुनेत्रा पवारांनी विधानपरिषदेची उमेदवारी दिली. पुण्यातील विधानपरिषदेच्या जागेसाठी सुनील टिंगरे हे इच्छुक होते. परंतु ऐनवेळी पक्षाने विक्रम काकडे यांना अधिकृत उमेदवारी दिली. त्यामुळे सुनील टिंगरे यांना डमी अर्ज भरल्याचे बोलले जात आहे.

आता विधानपरिषदेच्या उमेदवारीवरून सुनील टिंगरे यांच्या समर्थकांमध्ये नाराजी दिसून आली. या नाराजीनाट्यादरम्यान राष्ट्रवादीच्या पर्वती विधानसभा मतदारसंघाचे कार्याध्यक्ष रामदास गाडे पाटील यांनी पदाचा राजीनामा दिला. गाडे पाटील यांच्या राजीनाम्याने सुनेत्रा पवारांच्या राष्ट्रवादीला मोठा धक्का बसल्याची राजकीय वर्तुळात चर्चा आहे.

टिंगरे समर्थक रामदास गाडे पाटील म्हणाले, 'निष्ठावंतांना डावलून तिकीट देण्यात आलं. आमच्या सारख्या निष्ठावंत कार्यकर्त्यांचं मन दुखावलं गेलं आहे. सुनेत्रा पवारांना दोन दिवसांपूर्वी पत्र लिहिलं होतं. त्यावेळी म्हटलं होतं की, पक्षाची वाईट अवस्था आहे. दादांच्या निधनानंतर संघटनेच्या बांधणीला उतरती कळा लागली आहे. पक्ष वाढवायचा असेल, तर निष्ठावंत कार्यकर्त्यांना उमेदवारी दिल्यास पक्ष वाढेल. परंतु आज आजच्या उमेदवारीच्या घोषणामुळे तीव्र दु:ख झालं. दादांच्या जाण्याने आम्ही कसं तोंड देत आहोत, हे आम्हालाच माहीत आहे.