सचिन जाधव, साम टीव्ही, प्रतिनिधी

महाराष्ट्रातील विधानसभा निवडणुकीची आचारसंहिता जाहीर झाल्यापासून पोलीस यंत्रणा ॲक्शन मोडवर असल्याचं दिसत आहे. यातच आचारसंहिता जाहीर झाली तेव्हापासून ते आतापर्यंत पुणे शहर जिल्ह्यातील विविध भागात भरारी पथकांनी अनेक कारवाई केल्या. या कारवाईत रोख रक्कम आणि मुद्देमाल हस्तगत केला आहे.

भरारी पथकांना खेडशिवापूर येथे सापडलेल्या पाच कोटी रुपयांच्या रकमेसह खेड, आळंदी, मावळ, हडपसर, शिरूर, दौंड आणि वडगाव शेरी या ठिकाणी नऊ कोटींहून अधिक रुपयांची रोख रक्कम सापडली.

त्याशिवाय दोन लाख ४३ हजार लीटर एक कोटी ८२ लाख रुपये किमतीचे मद्य जप्त करण्यात आले. जिल्ह्यातील २१ मतदारसंघांमधून एक कोटी ८२ लाख रुपये किमतीचे मद्य जप्त करण्यात आले.

तर भोसरी, चिंचवड, दौंड, जुन्नर, कसबा पेठ, खेड-आळंदी, कोथरूड, मावळ, पुरंदर, शिवाजीनगर, शिरूर आणि वडगाव शेरी या मतदारसंघांतून सुमारे २३ लाख रुपये किमतीचे अमली पदार्थ आढळले आहेत.

कोथरूडमध्ये सुमारे ३७ किलो वजनाचे आणि १८ लाख १२ हजार रुपये किमतीची चांदी जप्त केली आहे.तसेच पर्वती मतदारसंघात ४३ हजार ७९२ ग्रॅम वजनाचे आणि सुमारे १३८ कोटी रुपये किमतीचे सोने-चांदीचे दागिने पोलिसांकडून जप्त करण्यात आले. मात्र, त्याची शहानिशा करून ते दागिने संबंधित सराफांना देण्यात आले.