संजय गडदे, साम टीव्ही

मुंबईच्या अंधेरीत संतापजनक घटना घडली आहे. मुंबईच्या अंधेरी (पूर्व) भागातील संतोषीमाता चाळीत मुलाने वडील आणि आजोबाची हत्या केल्याची घटना घडली आहे. तर मुलाने काकाला हल्ला करून जखमी केलं आहे. या दुहेरी हत्याकांडाने अंधेरीत खळबळ उडाली आहे.

मिळालेल्या माहितीनुसार, अंधेरी (पूर्व) येथील संतोषीमाता चाळीतील चेतन मनोज भात्रे (२३) या तरुणाने वडील, आजोबा आणि काकांवर चाकूने हल्ला केला. या हल्ल्यात वडील मनोज बाबू भात्रे (५७) आणि आजोबा बाबू देव्या भात्रे (७९) यांचा जागीच मृत्यू झाला.

या हल्ल्यात काका अनिल बाबू भात्रे (५४) गंभीर जखमी असून त्यांच्यावर नायर रुग्णालयात उपचार सुरू आहेत. या प्रकरणी एमआयडीसी पोलीस ठाण्यात गुन्हा दाखल करण्यात आला आहे. पोलिसांनी या प्रकरणी आरोपीला अटक केली आहे. पोलिसांनी पुढील तपास सुरू केला आहे.

काय आहे संपूर्ण प्रकरण?

आरोपीचे आजोबा वडील आणि काका हे दारू पीत प्यायचे. दारू प्यायल्यानंतर आरोपीला मारहाण शिवीगाळ करत करायचे. काल रात्री देखील दारू पिऊन आल्यानंतर त्यांनी चेतनला शिवीगाळ करायला सुरुवात केली. त्यानंतर चेतनने धारदार शस्त्राने वडील, आजोबा आणि काकावर हल्ला केला.

तरुणाच्या जीवघेण्या हल्ल्यात वडील आणि आजोबांचा मृत्यू झाला. तर काकाची प्रकृती गंभीर असून त्यांच्यावर नायर रुग्णालयात उपचार सुरू आहे. मागील अनेक वर्षांपासून कुटुंबामध्ये वादविवाद सुरु होते. वडील आणि आजोबांच्या दारू पिणे आणि सततच्या शिवीगाळीला कंटाळून आरोपीची आई देखील घर सोडून गेली होती.