महापालिका निवडणुकीसाठी सगळ्याच राजकीय पक्षांनी कंबर कसलीय... त्यातच गेल्या महापालिका निवडणुकीत ढासळलेला पिंपरी चिंचवड आणि पुणे महापालिकेचा बालेकिल्ला जिंकण्यासाठी दोन्ही राष्ट्रवादी एकत्र येण्याची चर्चा रंगली होती... मात्र आता थेट सुप्रिया सुळेंनीच दोन्ही राष्ट्रवादींच्या युतीचे संकेत दिलेत...

खरंतर पुणे आणि पिंपरी चिंचवड महापालिकेत भाजप आणि अजित पवारांच्या राष्ट्रवादी दोन्हीही पक्ष तुल्यबळ आहेत... तर पवारांच्या राष्ट्रवादीला मानणारा मोठा वर्ग या भागात आहे... मात्र भाजपनं मुंबई आणि पुण्यातील युतीच्या चर्चेतून अजित पवारांना वगळलं.. आणि दोन्ही राष्ट्रवादींनी युतीची चर्चा सुरु केलीय... मात्र आता या युतीविरोधात पक्षातूनच आवाज उठायला सुरुवात झालीय.. अजित पवारांसोबत युतीच्या चर्चा सुरु असल्यानं प्रशांत जगतापांनी थेट शहराध्यक्षपदाचा राजीनामा दिलाय.. तर काँग्रेसनंही पुण्यात महायुतीतील पक्षांसोबत युतीला विरोध दर्शवलाय...

मात्र दोन्ही राष्ट्रवादी एकत्र आल्यास भाजपसमोर कसं आव्हान उभं राहू शकतं पाहूयात....

2017 मध्ये भाजपने 25 वर्षापासून सत्तेवर असलेल्या राष्ट्रवादीचा पराभव करत 162 पैकी 97 जागा जिंकल्या. तर राष्ट्रवादीचा 39 जागांवर विजय झाला होता... दुसरीकडे शिवसेनेला अवघ्या 10 जागांवर तर 9 जागांवर काँग्रेस विजयी झालं होतं. अशातच महापालिका निवडणुकीत दोन्ही राष्ट्रवादी एकत्र आल्यास मतविभाजन टळून भाजपपुढे आव्हानं निर्माण होईल... तसचं पुण्यातील राष्ट्रवादीच्या पदाधिकाऱ्यांचे पक्षांतर थांबवणं दोन्ही पक्षांना शक्य होईल...

राज्यात भाजप आक्रमकपणे निवडणुका लढवत असताना दोन्ही राष्ट्रवादी एकत्र येणार आहेत... त्याची घोषणा 26 डिसेंबरला होण्याचे संकेत अजित पवारांनी दिलेत... मात्र ठाकरेंपाठोपाठ पवार काका-पुतण्यांची सत्तेसाठीची युती पुणेकरांना मान्य होणार का? याबरोबरच निष्ठावंत कार्यकर्त्यांचा उद्रेक थांबवून दोन्ही राष्ट्रवादी भाजपच्या ताब्यातील पुणे आणि पिंपरी चिंचवड महापालिका जिंकणार का? याचीच उत्सुकता लागलीय..