संघर्ष गांगुर्डे, साम टीव्ही

कल्याण-अहिल्यानगर महामार्गावरील महत्वाचा शहाड उड्डाणपूल पुन्हा एकदा अवजड वाहनांसाठी २० दिवस बंद राहणार आहे. डांबरीकरण आणि दुरुस्तीचं काम सुरू असल्याने वाहतूक पोलीस विभागानं नवीन अधिसूचना जारी केली आहे. दिवाळीनंतर पुन्हा एकदा वाहनधारकांना पर्यायी मार्गांचा अवलंब करावा लागणार आहे.

कल्याण-माळशेज महामार्गावरील शहाड उड्डाणपूलाचे सशक्तीकरण आणि वेअरिंग , डांबरीकरण व विविध दुरुस्तीचे काम सुरु करण्यात आले आहे. याआधी ही २८ सप्टेंबर ते १५ ऑक्टोबर या 18 दिवस देखभाल दुरुस्ती साठी या कालावधीत हा पूल अवजड वाहनांसाठी बंद करण्यात आला होता.

आता पावसाळा आणि दिवाळीच्या पार्श्वभूमीवर काम पूर्ण न होऊ शकल्याने राष्ट्रीय महामार्ग विभागानं काम थांबवून वाहतुकीस तात्पुरती परवानगी दिली होती.

आता पुन्हा एकदा ३ नोव्हेंबर ते २३ नोव्हेंबर २०२५ या कालावधीत पुलावर डांबरीकरण आणि इतर दुरुस्तीचे काम होणार असल्याने, या काळात अवजड वाहनांची वाहतूक पूर्णपणे बंद राहणार आहे.

लहान आणि हलकी वाहने मात्र एकतर्फी मार्गाने ये-जा करू शकतील. तर या कालावधी दरम्यान वाहन चालकाने पर्याय मार्ग वापरावे अशी विनंती देखील वाहतूक पोलिसांनी केली आहे.