सुशांत सावंत -

मुंबई: पत्राचाळ गैरव्यवहार प्रकरणी ईडीने (ED) अटक केलेले शिवसेना खासदार संजय राऊत (Sanjay raut) हे १४ दिवसांच्या न्यायालयीन कोठडीत होते. त्याची न्यायालयीन कोठडी आज संपल्यांने त्यांना न्यायालयात हजर करण्यात आलं होतं.

न्यायालयीन सुनावणीनंतर राऊतांची न्यायालयीन कोठडी आणखी वाढवण्यात आली असून त्यांना १९ सप्टेंबरपर्यंत न्यायालयीन कोठडी सुनावण्यात आली आहे. त्यामुळे राऊतांचा तुरुंगातील मुक्काम आणखी वाढला आहे.

पाहा व्हिडीओ -

३१ जुलै रोजी संजय राऊतांना ईडीने अटक केली होती. तेव्हापासून ते तुरुंगात आहेत. राऊतांना सुरुवातीला ८ दिवसांची ईडी कोठडी, मग २२ ऑगस्टपर्यंत न्यायालयीन कोठडी आणि नंतर १४ दिवसांची न्यायालयीन कोठडीतील वाढ करण्यात आली होती. आज न्यायालीन कोठडीची मुदत संपल्याने त्यांना न्यायालयात हजर करण्यात आलं होतं त्यानंतर पुन्हा त्यांच्या कोठडीत वाढ करण्यात आली आहे.

दरम्यान, आज भाजपचे जेष्ठ नेते तथा केंद्रीय मंत्री अमित शहा (Amit Shah) आज मुंबईत दाखल झाले असून त्यांनी लालबागच्या राजाचं (Lalbaugcha Raja) दर्शन देखील घेतलं. एकमेकांचे कधीकाळीचे मित्र असणारे भाजप-शिवसेना कट्टर विरोधक बनले आहेत. राऊतांवरील कारवाईला भाजपच कारणीभूत असून ईडीचा गैरवापर करण्यात येत असल्याचा आरोप सेनेकडून अनेक वेळा करण्यात येतो.

अशातच शहा मुंबईत असताना राऊतांची कोठडी वाढली आहे. याबाबतचा एक फोटो सध्या सोशल मिडियावर व्हायरल होत आहे. फोटोमध्ये एका बाजूला शहा दर्शनासाठी निघताना दिसत आहेत. तर दुसऱ्या बाजूला राऊत न्यायालयात हजर होण्यासाठी जाताना दिसतं आहेत. या फोटोची सोशल मिडियावर सध्या जोरदार चर्चा सुरु आहे.

Edited By - Jagdish Patil