Political News Today: भाजपचे खासदार गिरीश बापट यांच्या निधनानंतर रिक्त झालेल्या जागेवर पोटनिवडणूक होण्याची शक्यता आहे. पुणे लोकसभेच्या जागेवर काँग्रेस आणि राष्ट्रवादी काँग्रेसने केलेल्या दाव्यामुळे वाद वाढण्याची शक्यता आहे. राष्ट्रवादी काँग्रेसचे नेते अजित पवार यांनी अप्रत्यक्षपणे पुण्याच्या जागेवर दावा ठोकला आहे. (Latest Marathi News)

काँग्रेसला (Congress)या जागेवर सातत्याने पराभवाचा सामना करावा लागत असल्यामुळे ती जागा राष्ट्रवादी काँग्रेसला (NCP) मिळावी, अशी मागणी अजित पवारांनी केली आहे. तर दुसरीकडे या वादामध्ये आता संजय राऊतांनी ट्वीट करत आपली भूमिका मांडली आहे. या ट्विटमुळं चर्चेला उधाण आलं आहे.

संजय राऊत यांचे ट्विट

“कसेल त्याची जमीन याप्रमाणे जो जिंकेल त्याची जागा हे सूत्तर ठरले तर ‘कसबा’प्रमाणे पुणे (Pune) लोकसभा पोटनिवडणूक महाविकास आघाडीला सहज जिंकता येईल. जागांचा आकडा वाढवण्याचा हट्ट अनाठायी आहे. जिंकेल त्याची जागा या सूत्राने महाराष्ट्र व देश जिंकता येईल. संविधान आणि लोकशाही वाचवण्यासाठी प्रत्येकानं थोडा थोडा त्याक करावाच लागेल. जय महाराष्ट्र”, असं ट्वीट संजय राऊतांनी (Sanjay Raut) केलं आहे. या ट्वीटमध्ये त्यांनी अजित पवार, नाना पटोले आणि मल्लिकार्जुन खर्गे या तिघांना टॅग केलं आहे. (Political News)

काय म्हणाले होते अजित पवार?

पुण्यात राष्ट्रवादी पक्षाची ताकद जास्त आहे त्यामुळे ती जागा राष्ट्रवादी काँग्रेसलाच मिळायला हवी. २०१९मध्ये काँग्रेस व राष्ट्रवादी काँग्रेसची आघाडी होती. त्यावेळी ती जागा काँग्रेसकडे गेली होती. मात्र, काँग्रेसला या जागेवर सातत्याने पराभवाचा सामना करावा लागत असल्यामुळे ती जागा राष्ट्रवादी काँग्रेसला मिळावी, अशी मागणी अजित पवारांनी (Ajit Pawar) केली आहे. दरम्यान संजय राऊत यांच्या या ट्विटमुळे पुण्याची जागा राष्ट्रवादीला जाणार का? असा सवाल उपस्थित होत आहे.