Sanjay Raut News: मुंबईत १९ जून रोजी शिवसेनेचे दोन वर्धापन दिन साजरे करण्यात येणार आहे. ठाकरे गटाचा षण्मुखानंद सभागृह सायन येथे वर्धापन दिन साजरा होणार आहे. तर शिंदे गटाचा गोरेगावातील नेस्को संकुलात होणार आहे. या वर्धापनासाठी शिंदे गटाने जय्यत तयारी केली आहे. 'वाघ निघाले गोरेगावला...' अशी पोस्टरबाजी शिंदे गटाने वर्धापन दिनाच्या पार्श्वभूमीवर केली आहे. यावरून वाघाचे कातडे पांघरून लांडगे गोरेगावला निघाले, असं म्हणत ठाकरे गटाचे खासदार संजय राऊत यांनी शिंदे गटाला टोला हाणाला आहे. (Latest Marathi News)

संजय राऊत यांनी मुंबईत प्रसारमाध्यमांशी संवाद साधला. त्यावेळी राऊत यांनी शिंदे गटावर टीका केली. संजय राऊत म्हणाले,'मिंदे गटाचे काही पोस्टर येताना पाहिले. वर्धानपन दिनाला वाघ निघाले गोरेगावला, असं त्या पोस्टरवर लिहिलं होतं. त्यांनी एकदा मराठी नीट शिकून घ्यावं. ते वाघाचे कातडे पांघरून लांडगे निघाले गोरेगावला, असं त्यांनी करायला पाहिजे'.

संजय राऊत पुढे म्हणाले, 'पक्षाची पुढची दिशा ठरवण्यासाठी आज उद्धव ठाकरे हे या ठिकाणी आलेल्या वाघांना मार्गदर्शन करतील. आगामी निवडणुका तर पुढे आहेतच. आपण पुढे पक्षाची वाटचाल नेमकी कशी असणार, त्याबद्दल आजच्या शिबिरामध्ये मार्गदर्शन होईल. उद्धव ठाकरे हेच शिवसेनेचे पक्षप्रमुख आहेत. त्यामुळे दुसरा कुठलाही प्रस्ताव इथे मांडला जाणार नाही, ही काय राष्ट्रीय कार्यकारिणी नाही हे एक शिबिर आहे'.

भाजप प्रदेशाध्यक्ष चंद्रशेखर बावनकुळे यांच्यावर टीका करताना राऊत म्हणाले, 'चंद्रशेखर बावनकुळे यांना राज्य नीट असं माहीत नाही. त्यामुळे ते काय बोलतात, माहीत नाही. त्यांना जास्त गांभीर्याने घेऊ नका'