समृद्धी महामार्गावर शासकीय अभियंत्याचे अपहरण करून त्यांना लुटल्याच्या घटनेचा कल्याण ग्रामीण टिटवाळा पोलिसांनी अवघ्या २४ तासांत छडा लावला आहे. या प्रकरणात पोलिसांनी पाच जणांना छत्रपती संभाजीनगर येथून अटक केली आहे. धक्कादायक बाब म्हणजे, अटक केलेल्या आरोपींपैकी काही जण यापूर्वी संबंधित अभियंत्याच्या गाडीवर बदली चालक म्हणून काम करत होते.

मिळालेल्या माहितीनुसार, शासकीय कार्यकारी अभियंता खान अब्दुल फरीद अब्दुल हामिद यांचा समृद्धी महामार्गावर प्रवास सुरू असताना आरोपींनी त्यांना लक्ष्य केले. आरोपींनी त्यांचे अपहरण करून त्यांच्याकडील ३० हजार रुपये रोख रक्कम आणि मोबाईल फोन हिसकावून घेतला. या घटनेमुळे महामार्गावरील प्रवाशांच्या सुरक्षेचा प्रश्न पुन्हा एकदा चर्चेत आला आहे.

या गुन्ह्याच्या तपासादरम्यान पोलिसांना महत्त्वाची माहिती मिळाली. आरोपींपैकी काही जण यापूर्वी अभियंत्याच्या वाहनावर बदली चालक म्हणून काम करत असल्याने त्यांना त्यांच्या प्रवासाची वेळ, जाण्या-येण्याचे नियोजन आणि पैशांबाबत माहिती होती. याच माहितीचा गैरफायदा घेत त्यांनी दरोड्याचा कट आखल्याचा संशय पोलिसांनी व्यक्त केला आहे. पोलिसांनी तपासाची सूत्रे वेगाने हलवत छत्रपती संभाजीनगर येथून आकाश मर्दनसिंग उसारे, गोपाल कमललाल बनमावत ऊर्फ राजपूत, लहू जयसिंग बारवार, दुर्गेश ताराचंद फतपुरे आणि आकाश बाबुलाल शेवाळे या पाच आरोपींना अटक केली.

या घटनेत आणखी काही जण सहभागी असण्याची शक्यता पोलिसांनी व्यक्त केली असून त्यांचा शोध सुरू आहे. अटक केलेल्या पाचही आरोपींना कल्याण न्यायालयात हजर करण्यात आले. न्यायालयाने त्यांना पाच दिवसांची पोलीस कोठडी सुनावली आहे. या आरोपींनी दरोड्याचा कट नेमका कसा रचला, त्यांना आणखी कोणाची मदत मिळाली आणि यापूर्वीही त्यांनी अशा प्रकारचे गुन्हे केले आहेत का, याचा तपास पोलीस करत आहेत. अवघ्या एका दिवसात आरोपींना पकडल्याने पोलिसांच्या या कारवाईचे महत्त्व वाढले आहे.