Saif Ali Khan Attack Updates : अभिनेता सैफ अली खानवर मध्यरात्री राहत्या घरात जीवघेणा हल्ला झाला. रात्री अडीच-तीनच्या सुमारास हल्लेखोर सैफच्या घरात घुसला. प्राथमिक तपासात हल्ला करणारा व्यक्ती हा चोरीच्या उद्देशाने घरात घुसला होता असे म्हटले जात होते. या प्रकरणात महत्त्वाची माहिती समोर आली आहे. या माहितीनुसार, हल्लेखोराने सैफच्या घरातील नॅनीकडे एक कोटी रुपयांची मागणी केली होती.

सैफ अली खानचा धाकटा मुलगा जेह यांची काळजी घेण्याची जबाबदारी नर्स एलियामा फिलिप यांच्याकडे आहे. त्या जेहच्या नॅनी आहेत. त्यांनी पोलिसांना या घटनेची सविस्तर माहिती दिली. मध्यरात्री हल्लेखोर घरात घुसला. तो जेहच्या खोलीत शिरला, तेव्हा जेह झोपला होता. जेहच्या खोलीत एलियामा होत्या. हल्लेखोराने धारदार चाकू दाखवून एलियामा यांना धमकावले आणि १ कोटी रुपये देण्याची धमकी दिली.

एलियामा यांनी पैसे देण्यास नकार दिला. तेव्हा हल्लेखोराने त्यांच्याशी धक्काबुक्की केली. त्यात एलियामा यांच्या हाताला दुखापत झाली. जेहच्या खोलीतून येणारा आवाज ऐकून सैफ जागा झाला. एलियामा आणि हल्लेखोर यांच्या भांडणात सैफ मध्ये पडला. तेव्हा हल्लेखोराने सैफवर चाकूने वार केले. गंभीर जखमा झाल्यानंतर सैफला रुग्णालयात दाखल करण्यात आले.

दरम्यान हल्लेखोर सैफ अली खानच्या इमारतीच्या बाजूला असणाऱ्या भिंतीवर चढून त्याच्या घरात घुसला होता अशी माहिती समोर आली आहे. भिंत ओलांडल्यानंतर तो शिड्यांचा वापर करुन घरापर्यंत पोहोचला. शिड्यांवर चढताना त्याचा चेहरा एका सीसीटीव्हीमध्ये कैद झाला. या आरोपीला पकडण्यासाठी पोलिसांचे शर्थीचे प्रयत्न सुरु आहेत. पोलिसांच्या १० तुकड्या हल्लेखोराचा शोध घेत आहेत. या प्रकारामुळे संपूर्ण बॉलिवूड हादरले आहे.