सुप्रीम मस्कर, साम टिव्ही

पुणे : पुण्यातील वैष्णवी हगवणे प्रकरणामुळे चर्चेत आलेले पोलीस अधिकारी जालिंदर सुपेकर पुन्हा एकदा नव्या वादात अडकलेत. पुण्यातल्या कारागृहात कैद्यांच्या दिवाळी फराळमध्ये भ्रष्टाचाराच्या आरोपानंतर राजू शेट्टींनी पुन्हा सुपेकरांवर आरोप केलाय. यावेळी राज्याच्या कारागृह विभागात रेशन , कॅन्टीन तसेच इतर उपकरण खरेदीमध्ये ५०० कोटींचा घोटाळा झाल्याचा आरोप राजू शेट्टींनी केलाय.

राज्यातील कारागृह की भ्रष्टाचाराचे अड्डे?

कैद्यांच्या नावाखाली राज्यातील कारागृहात ५०० कोटींचा घोटाळा

तत्कालीन DGP अमिताभ गुप्ता आणि IG जालिंदर सुपेकर यांचा घोटाळ्यात सहभाग, शेट्टींचा आरोप

२०२२ ते २०२५ या वर्षात राज्यातील कारागृहात घोटाळा

कारागृहात रेशन, कॅन्टीन आणि इतर उपकरणे खरेदीमध्ये घोटाळा

दरम्यान, कारागृहातील कैद्यांना १ वेळचा चहा आणि दोन वेळचे जेवण वगळता बेकरी पदार्थ , फळे , भाजीपाला यासह दैनंदिन वापरासाठी लागणाऱ्या तब्बल ६२७ प्रकारच्या साहित्याच्या खरेदीचे दर जालिंदर सुपेकर यांनी निश्चीत केले असल्याचं सुद्धा शेट्टींनी सांगितले. हे दर बाजारदरापेक्षा जास्त होते असाही आरोप राजू शेट्टींनी केलाय.

कैद्यांसाठीच्या खाद्यपदार्थांचे दर

द्राक्षे: २१५ रूपये किलो

टोमॅटो: ७५ रूपये किलो

कांदा: ८८ रूपये किलो

बटाटा: ८७ रूपये किलो

गूळ: ९० रूपये किलो

साखर: ५३ रूपये किलो

चिकन: ३०० रूपये किलो

केळी: ७० रूपये डझन

कैद्यांच्या पालनपोषणासाठी राज्य सरकार वर्षाकाठी शेकडो कोटी रुपये खर्च करत असते. त्यामुळे राजू शेट्टींच्या आरोपानुसार कैद्याच्या नावाखाली भ्रष्टाचार होत असेल तर ही नक्कीच गंभीर बाब आहे. आता राजू शेट्टींच्या आरोपात किती तथ्य आहे? शेट्टींच्या आरोपानंतर सुपेकर आणि गुप्ता यांची सखोल चौकशी होणार का? हे पाहणं महत्त्वाचं आहे.