Mumbai Pune Rain News: गेल्या अनेक दिवसांच्या प्रतीक्षेनंतर आज अखेर पावसाने मुंबई आणि पुण्यासह राज्यातील अनेक भागात हजेरी लावली. पावसाच्या सरी बरसताच आज मुंबईमध्ये अनेकांनी घरातून बाहेर पडत भिजत पहिल्या पावसाचा आनंद लुटला. तर काहींनी घरातच चहा आणि गरमागरम भजीचा आस्वाद घेतला.

पावसामुळे शहराचं वातारण आल्हाददायक झालं आहे. मुंबईतील अनेक नागरिक आता चौपाट्यांवर जात पावसाचा आनंद घेत आहेत. उद्या रविवार असल्याने अनेकजण पहिल्या पावसानंतर लगेचच पिकनिकचा प्लान देखील करत आहेत.

असं सगळं असलं तरी अद्याप मान्सून मुंबईत दाखल झालेली नाही. अशी माहिती हवामान विभागाने दिली आहे. मान्सून आज अलिबागपर्यंत पोहोचला आहे. पुढील दोन दिवसांत तो मुंबईतही दाखल होण्यासाठी स्थिती अनुकुल आहे, अशी माहिती हवामान विभागाने दिली आहे. (Latest Marathi News)

पुण्यासह अहमदनगर जिल्ह्यात देखील आज पावसाचं आगमन झालं आहे. जिल्ह्यात अनेक ठिकाणी दमदार पावसाने हजेरी लावली. मृग नक्षत्र कोरडं गेल्याने खरिपाच्या पेरण्या रखडल्या आहेत. आज पावसाला सुरुवात झाल्याने शेतकरी आणि नागरिक सुखावले आहेत. उकाड्याने हैराण झालेल्या नागरीकांना दिलासा मिळालाय, अनेक ठिकाणी शेतकऱ्यांनी पेरणी आणि लावणीचे कामं सुरू केली आहेत.

यातच माणगावमध्येही सकाळपासून उघडझाप करणाऱ्या पावसाने दुपारनंतर जोर धरला. दुपारी तीन ते संध्याकाळी पाच वाजण्याच्या सुमारास बरसलेल्या पावसाने माणगावमध्ये वाहनांना फोकस लाऊन वाहन चालवण्याची वेळ आली. या जोरदार पावसामुळे शाळकरी मुलं, पालक आणि दुचाकी स्वारांचे देखील हाल झालेत.