पुणे-नगर महामार्गावरील वाघोली भागात कायमस्वरूपी जाणवणाऱ्या वाहतूक कोंडीवर नियंत्रण मिळवण्यासाठी पुणे वाहतूक विभागाने प्रायोगिक उपाययोजना सुरू केल्या आहेत. या उपाययोजनांची अंमलबजावणी शुक्रवारपासून करण्यात आली असून, त्याचा काही अंशी परिणाम दिसून येत आहे. मात्र, या बदलांमुळे वाहनचालकांमध्ये गोंधळ निर्माण होत असून वाहतूक कोंडी अद्यापही पूर्णपणे सुटलेली नाही.

वाहतूक कोंडी कमी करण्यासाठी रस्त्याच्या चौकांमध्ये दिशादर्शक फलक लावण्यात आले असून, वाहनचालकांनी या फलकांकडे लक्ष देऊन त्यानुसार वाहतूक नियमांचे पालन करावे, असे आवाहन वाहतूक विभागाकडून करण्यात आले आहे. वाघोली परिसरात प्रायोगिक तत्वावर राबवण्यात येणाऱ्या या नियोजनाचा उद्देश वाहतुकीचा प्रवाह सुरळीत ठेवण्याचा आहे.

यासाठी पुणे शहर वाहतूक विभागाचे अतिरिक्त आयुक्त मनोज पाटील आणि उपायुक्त हिम्मत जाधव यांनी स्वतः वाघोलीतील प्रमुख चौकांमध्ये उभे राहून परिस्थितीचा आढावा घेतला. याशिवाय वाघोली वाहतूक विभागाचे सहायक पोलिस निरीक्षक दत्तात्रय लिगाडे हे त्यांच्या पथकासह वाहतुकीवर बारकाईने लक्ष ठेवून आहेत. वाघोली पोलीस ठाण्याचे वरिष्ठ पोलिस निरीक्षक युवराज हांडे हे देखील त्यांच्या कर्मचाऱ्यांसह मदत करत आहेत.

शनिवारी देखील या अधिकाऱ्यांनी वाघोली परिसराचा दौरा करत सुरू असलेल्या उपाययोजनांचा आढावा घेतला. यावेळी वाहतूक नियोजनात मदत करणारे स्थानिक प्रतिनिधी अनंता कटके, कल्पेश जाचक, संपत गाडे आणि तात्या आव्हाळे हे देखील उपस्थित होते. प्रशासनाकडून या उपाययोजनांमधून वाहतूक कोंडी कमी करण्याचा प्रयत्न सुरू असून, नागरिकांनी सहकार्य करावे, असे आवाहन करण्यात आले आहे.

काय आहेत उपाययोजना?

1. आव्हाळवाडी चौकातून लोहगाव कडे जाण्यास बंदी.

2. केसनंद फाटा चौकात उजवीकडे वळण्यास ( केसनंद कडे ) बंदी.

3. केसनंद फाटा चौकापासून पुढे ३०० मीटर वर ( स्टार बजार  जवळ ) उजवीकडे (केसनंदकडे ) वळण घेता येईल.

4. केसनंद रोड वरून नगर कडे जाणाऱ्यांसाठी केसनंद फाटा चौकातून वळण घेता येईल.

5. आव्हाळवाडी चौकातून लोहगाव कडे अथवा गावात जाण्यासाठी वाघेश्वर मंदिर चौकातून जावे लागेल.