Pune University Ramleela Play Controversy

: सावित्रीबाई फुले विद्यापीठातील ललित कला केंद्राच्या अंगणमंचावर रामलीला विषयावरील नाटकावरून मोठा गदरोळ निर्माण झाला आहे. या नाटकातील कलाकरांवर टीका केली जात आहे. याचदम्यान, ललित कला केंद्राचे विभाग प्रमुख डॉ. प्रवीण भोळे यांच्यासह अन्य विद्यार्थ्यांना अटक करण्यात आली आहे. तर दुसरीकडे आज भाजप कार्यकर्त्यांनी ललित कला केंद्राचं कार्यालय फोडलं आहे. (Latest Marathi News)

सावित्रीबाई फुले विद्यापीठ नाटक प्रकरणी ललित कला केंद्राचे प्रमुख डॉक्टर प्रविण भोळे यांच्यासह सहा जणांना कालच्या नाटकाबाबत अटक करण्यात आली आहे. रामलीलेवरील या नाटकातील संवादांवर अखिल भारतीय विद्यार्थी परिषदेकडून आक्षेप घेण्यात आला होता. अखिल भारतीय विद्यार्थी परिषदेच्या कार्यकर्त्यांनी नाटक बंद पाडलं होतं.

अखिल भारतीय विद्यार्थी परिषदेकडून नाटकाशी संबंधित व्यक्तीविरुद्ध तक्रार दाखल करण्यात आली होती. तसेच नाटकाचे दिग्दर्शक, काम करणारे कलावंत यांच्यासह ललित कला केंद्राचे प्रमुख डॉक्टर प्रविण भोळे यांना अटक करण्यात आली. त्यानंतर दुपारी त्यांना न्यायालयात हजर करण्यात आलं.

ललित केंद्राच्या प्रमुखांसह विद्यार्थ्यांना जामीन मंजूर

सावित्रीबाई फुले विद्यापीठ नाटक प्रकरणात आरोपींनी न्यायालयात जामीनासाठी केलेला अर्ज न्यायालयाने मंजूर केला आहे. या प्रकरणी ललित केंद्राचे प्रा. प्रवीण भोळे आणि विदयार्थ्यांना जामीन मंजूर करण्यात आला आहे. आता या प्रकरणाची उच्च न्यायालयात सुनावणी होणार आहे.   (साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

काय आहे नेमकं प्रकरण?

सावित्रीबाई फुले पुणे विद्यापीठातील ललित केंद्रात विद्यार्थ्यांकडून काल सायंकाळी रामायणात काम करणाऱ्या कलाकारांच्या आयुष्यावर आधारित एका नाटकाचं सादरीकरण होतं.

'जब वी मेट' नावाच्या नाटकात कालाकारांचं वैयक्तिक आयुष्य दाखवण्याचा प्रयत्न करण्यात आला होता. मात्र, हे नाटकातील संवादांवर अखिल भारतीय विद्यार्थी परिषदेच्या कार्यकर्त्यांनी आक्षेप घेत नाटकाचा प्रयोग उधळून लावला. तसेच यावेळी नाटकात काम करणाऱ्या विद्यार्थ्यांना मारहाण देखील करण्यात आली. त्यानंतर सावित्रीबाई फुले पुणे विद्यापीठात पोलीस तैनात करण्यात आले होते.