पुण्यातील हिंजवडीत एका २५ वर्षीय अभियंत तरूणीनं २१ व्या मजल्यावरून आत्महत्या केली. 'सॉरी मला माफ करा, मी स्वच्छेनं हे पाऊल उचलत आहे, माझी आता जगायची इच्छा नाही' असं म्हणत तिनं टोकाचं पाऊल उचललं. आत्महत्या करण्यापूर्वी तिने चिठ्ठी लिहिली होती. सध्या पोलीस या घटनेचा अधिक तपास करीत आहे. दरम्यान, आत्महत्या करण्यापूर्वीचा व्हिडिओ तरूणीचा व्हिडिओ समोर आला आहे. या व्हिडिओत आत्महत्या करण्यापूर्वी तिने काय काय केलं, हे समोर आलं आहे.

अभिलाषा भाऊसाहेब कोथंबिरे असे २५ वर्षीय मृत तरूणीचे नाव आहे. तिनं हिंजवडी येथील द क्राऊन ग्रीन सोसायटीच्या २१ व्या मजल्यावरून उडी घेत आयुष्य संपवलं. पोलिसांनी दिलेल्या माहितीनुसार, अभिलाषा घटनेच्या दिवशी पहाटे ४:३० वाजेच्या सुमारास दुचाकीने सोसायटीच्या आवारात आली होती.

त्यानंतर लिफ्टने घरी २१ व्या मजल्यावर पोहोचली. लिफ्टमध्ये ती शांतपणे उभी होती. तिने स्कार्फ बांधलेला होता. ४ वाजून ४२ मिनिटांनी ती लिफ्टमधून बाहेर पडली. नंतर २१ व्या मजल्यावरून उडी घेत तिने आयुष्य संपवलं. जोरात आवाज आल्यानंतर सोसायटीतील रहिवासी खडबडून जागे झाले. पोलिसांना याची माहिती देण्यात आली. तसेच मृतदेह शवविच्छेदनासाठी रूग्णालयात पाठवलं.

अभिलाषाचा शवविच्छेदन अहवाल समोर आला असून, त्यात शरीरावरील महत्वाच्या अवयवांना गंभीर इजा झाल्याचं नमूद करण्यात आलं आहे. या प्रकरणी हिंजवडी पोलीस ठाण्याचे वरिष्ठ पोलीस निरीक्षक कन्हैया थोरात यांनी अभिलाषाच्या मृत्यूची आकस्मिक नोंद केली असून , या घटनेत कोणत्याही प्रकारचा घातपात अथवा संशयास्पद काही संकेत आढळून आले नसल्याचे त्यांनी सांगितलं आहे.

प्राथमिक तपासात अभिलाषाने नैराश्यातून आत्महत्या केली असल्याचं पोलीस तपासातून समोर आलं आहे. पोलिसांनी खोलीची झडती घेतली. खोलीमध्ये तिने लिहिलेली एक सुसाइट नोट सापडली. तिने सुसाईड नोटमध्ये आपल्या आई- वडिलांची आणि मैत्रिणींची देखील माफी मागितली. याबाबत अधिक तपास हिंजवडी पोलिस करीत आहेत.