Pune: पुण्यात उद्या ११ ऑगस्ट २०२६ रोजी तिरंगा रॅलीचे आयोजन करण्यात आलं आहे. या रॅलीच्या पार्श्वभूमीवर शहरातील काही महत्त्वाच्या रस्त्यांवरील वाहतुकीत तात्पुरते बदल करण्यात येणार आहेत. नागरकिरांनी पर्यायी मार्गांचा वापर करून वाहतूक पोलिसांना सहकार्य करण्याचे आवाहन पोलिस प्रशासनाने केले आहे.

फर्ग्युसन महाविद्यालय रस्त्यावरच्या ललित महल हॉटेल चौक ते ज्ञानेश्वर महाराज पादुका चौक, तुकाराम महाराज पादुका चौक, गुडलक चौक आणि पुढे गरवारे चौक असा रॅलीचा मार्ग असणार आहे. रॅलीच्या वेळी गर्दी आणि वाहतुकीची परिस्थिती लक्षात घेऊन दुपारी २ वाजल्यानंतर आवश्यकतेनुसार वाहतूक वळवली जाणार आहे.

खंडोजीबाबा चौक ते गरेवारे चौक वाहतुकीत बदल

खंडोजीबाबा चौक ते गरेवारे चौक मार्गावर वाहतुकीवर परिणाम होण्याची शक्यता आहे. त्यामुळे या मार्गावरून प्रवास करणाऱ्या वाहनचालकांनी पर्यायी रस्त्यांचा वापर करावा. तर स्वारगेटहून पुणे विद्यापीठाच्या दिशेने जाणाऱ्या वाहनांसाठी अलका चौक, खंडोजीबाबा चौक, वीर सावरकर चौक, अण्णाभाऊ चौर, सेनादत्त चौक, म्हात्रे पूल, नळ स्टॉप आणि लॉ कॉलेज रोड या पर्यायी मार्गाचा वापर करता येणार आहे.

तसेच स्वारगेट ते खिडकी किंवा जुन्या पुणे - मुंबई महामार्गाकडे जाणाऱ्या वाहनांनी अण्णाभाऊ साठे चौक, पूरम चौक, बाजीराव रोड, गाडगीळ पुतळा, कुंभार वेस आणि आरटीओ चौक या मार्गाचा वापर करण्याचे आवाहन केलं आहे.

खंडोजीबाबा चौकाकडे येणाऱ्या वाहनांसाठी नळ स्टॉप, पौड फाटा, आठवले चौक आणि लॉ कॉलेज रोडच्या पर्यायी मार्ग वापरण्याची सूचना आहे. अलका टॉकीज चौकाकडून येणार्‍या वाहनांनी केळकर रस्ता, नदीपात्र, शनिवारवाडा आणि गाडगीळ पुतळा मार्गाचा वापर करावा.