सचिन जाधव, साम टीव्ही पुणे

पुणे-सोलापूर महामार्गावर मंगळवारी रात्रीच्या सुमारास भीषण अपघात झाला. सुसाट वेगात असलेल्या डंपरने विरुद्ध दिशेने येणाऱ्या कारला जोरदार धडक दिली. ही धडक इतकी भीषण होती, की यात कारचा अक्षरश: चक्काचूर झाला. या अपघात पिता-पुत्राचा जागीच मृत्यू झाला. तर तिघेजण गंभीर जखमी झाले आहेत. त्यांना उपचारासाठी रुग्णालयात दाखल करण्यात आलंय. या घटनेनं हळहळ व्यक्त होत आहे.

अभिजित सुरेश पवार (वय ३६) आणि सुरेश प्रभाकर पवार (वय ६२) अशी अपघातात (Pune Accident) मृत्युमुखी पडलेल्या पिता-पुत्रांची नावे आहेत. तर अभिजित यांची पत्नी प्रणिता पवार, पुतण्या रियांश पवार आणि आई सुलोचना पवार हे गंभीर जखमी झाले आहेत. जखमींना उपचारासाठी रुग्णालयात दाखल करण्यात आलं आहे.

मिळालेल्या माहितीनुसार, पुण्यातील (Pune News) ट्रिनिटी सोसायटी, बकोरी फाटा, वाघोली येथे राहणारे पवार कुटुंबिय काही कामानिमित्त बाहेर गेले होते. मंगळवारी रात्री पुण्याकडे परतत असताना पुणे-सोलापूर महामार्गावरील थेऊर फाट्याजवळ गणेशवाडी येथे त्यांच्या कारला एका डंपरने जोरदार धडक दिली.

अपघात इतका भीषण होता, की डंपरच्या धडकेत कारचा अक्षरश: चक्काचूर झाला. या घटनेत अभिजित सुरेश पवार आणि सुरेश प्रभाकर पवार या पिता-पुत्रांचा जागीच मृत्यू झाला. तर कारमधील अन्य तिघेजण गंभीर जखमी झाले. अपघातानंतर महामार्गावर वाहनांच्या लांबच लांब रांगा लागल्या होत्या.

नागरिक आपल्याकडे येत असल्याचं पाहून डंपरचालक पसार झाला. स्थानिकांनी या घटनेची माहिती पोलिसांना दिली. अपघाताची माहिती मिळताच पोलिसांनी तातडीने घटनास्थळ गाठत बचावकार्य केले. या प्रकरणी लोणी काळभोर पोलिस ठाण्यात डंपरचालक संदेश लक्ष्मणराव पवार (वय ३३, रा. वाघोली) याच्याविरुद्ध गुन्हा दाखल केला आहे.