पुण्यातील वारजेमध्ये दृश्यम स्टाइल हत्याकांड घडलं आहे. पुण्यात एका बिझनेसमनने बायकोची निर्घृण हत्या केली आहे. पत्नीच्या विवाहबाह्य संबंध असल्याच्या संशयावरून पुण्यात बिझनेसमनने बायकोला संपवलं. हत्या केल्यानंतर पुरावे नष्ट करून बायको हरवल्याची तक्रार पोलिसांत केली होती. या हत्याकांडाचा पहिला सीसीटीव्ही समोर आला आहे.

पत्नीच्या कथित प्रेमसंबंधाच्या संशयावरून पतीने पत्नीचा गळा आवळून खून केला. त्यानंतर तिचा मृतदेह नदीत फेकून दिला. या जोडप्याचा भेळ खाण्यासाठी गेलेल्या ठिकाणाचा सीसीटीव्ही आता समोर आला आहे. या व्हिडिओमध्ये आरोपी पती त्याच्या पत्नीला घेऊन जात असल्याचे समोर आलं आहे. भेळ खात असताना पतीने पत्नीचा गळा दाबून खून केला.

हत्या केल्यानंतर स्वतः पतीने पुरावे नष्ट करून पोलिसांत हरवल्याची तक्रार दिली होती. वारजे पोलिसांनी तपासात थरकाप उडवणारा हा गुन्हा उघडकीस आणला आहे. समीर पंजाबराव जाधव असे या आरोपीचे नाव आहे. तर अंजली समीर जाधव (वय ३८) असे हत्या झालेल्या पत्नीचे नाव आहे.

काय आहे प्रकरण?

पत्नीचे एका व्यक्तीशी प्रेमसंबंध असल्याचा संशय नवऱ्याला आला. तिच्या मोबाईलवरील चॅट्स पाहिल्यानंतर अनेकदा वाद झाले. ती सुधारणार नाही हे लक्षात आल्याने तिचा काटा काढायचे ठरवले. त्यासाठी त्याने शिंदेवाडी येथे १८ हजार रुपये भाड्याने एक गोदाम घेतले. लोखंडी बॉक्स तयार करून तिथे ठेवला आणि लाकडाची पोती आणून ठेवल्यानंतर हत्येची तयारी केली.

आरोपीने २६ ऑक्टोबर रोजी अंजलीला कारने फिरायला नेले. नवले ब्रिजमार्गे खेडशिवापूर, मरीआई घाट परिसरात फिरवल्यानंतर परतीच्या प्रवासात शिंदेवाडी येथे थांबून भेळ खाण्याचा बहाणा केला. गोदामात चटईवर बसून दोघे भेळ खात असताना अचानक तिचा गळा दाबून खून केला. त्यानंतर पत्नीचा मृतदेह लोखंडी बॉक्समध्ये टाकून पेट्रोल ओतून जाळला. राख नदीपात्रात टाकली आणि बॉक्स भंगारात विकला.