अक्षय बडवे, साम टीव्ही

पुण्यात गुन्हेगारी घटनांमध्ये वाढ होत असल्याचं चित्र आहे. अशातच आणखी एका घटनेमुळे शहरात खळबळ उडाली आहे. सिगारेट न दिल्याच्या रागातून तरूणांच्या टोळक्याने दुकानदाराला शिवीगाळ करत दुकान फोडलंय. दुकानावर कोयत्याने वार करत दुकानाचं नुकसान केलं आहे. हा सर्व प्रकार सीसीटीव्ही कॅमेऱ्यामध्ये कैद झाला आहे. या प्रकरणानंतर उत्तमनगर पोलीस ठाण्यात गुन्हा दाखल करण्यात आला असून, आरोपींचा शोध सुरू आहे.

ही संतापजनक घटना पुण्यातील उत्तमनगर पोलीस ठाण्याच्या हद्दीत घडली आहे. मिळालेल्या माहितीनुसार, अल्पवयीन आरोपी तरूण आधी दुकानात गेले. हे तरूण दुकानदाराच्या ओळखीचे असल्याची माहिती आहे. अल्पवयीन तरूणांनी दुकानदाराकडे सिगारेटची मागणी केली. मात्र, दुकानदाराने सिगारेट देण्यास नकार दिला. यानंतर तरूण निघून गेले.

नंतर ते पुन्हा दुकानात परतले, तसेच दुकानदाराशी वाद घातला. तरूणांनी शिवराळ भाषेत दमदाटीही केली. नंतर कोयता बाहेर काढून थेट दुकानावर हल्ला चढवला. या अचानक हल्ल्यामुळे दुकानाचे मोठे नुकसान झाले आहे. ही संपूर्ण घटना सीसीटीव्ही कॅमेऱ्यात कैद झाली आहे. दरम्यान, सीसीटीव्ही पोलिसांच्या हाती लागताच त्यांनी घटनास्थळी जाऊन गुन्ह्याची नोंद केली. या घटनेनंतर नागरिकांमध्ये भीतीचं वातावरण पसरले असून, पोलिसांकडून आरोपीचा शोध सुरू आहे.

एसटी बस आणि दुचाकीच्या धडकेत दोघांचा दुर्दैवी मृत्यू

नांदेड देगलूर तालुक्यातील हानेगांवजवळ एक भीषण अपघाताची घडली आहे. एसटी बस आणि दुचाकीच्या धडकेत दोघांचा दुर्दैवी मृत्यू झाला आहे. नरसिंग पाटील आणि सोपान बिरादार असे मृत व्यक्तींची नावे आहेत. हा अपघात घडल्यानंतर त्यांना तातडीने रूग्णालयात उपचारासाठी नेण्यात आले. मात्र, उपचारापूर्वीच त्या दोघांचा मृत्यू झाला. हा अपघात नेमका कसा घडला? हे अद्याप समोर आलेले नाही. या प्रकरणी मरखेल पोलिसांनी घटनास्थळी येत पंचनामा करत तपास सुरू केलाय.