पहलगाममध्ये झालेल्या भ्याड दहशतवादी हल्ल्यानंतर संपूर्ण देशाचं वातावरण ढवळून निघालं. या हल्ल्यानंतर भारतातूनही सडेतोड उत्तर देण्यात येत आहे. अशातच पुण्यातील पिरंगूटमधील स्थानिक मुस्लिमांना एक ठराव मंजूर केला आहे. ठरावानुसार, स्थानिक मुस्लिम वगळता, इतर मुस्लिमांना मशिदीत प्रवेशबंदी करण्यात आली आहे. पिरंगूटच्या ग्रामपंचायतीने घेतलेल्या बैठकीत गावातील मशिदीच्या सुरक्षेच्या दृष्टीनं हा ठराव मंजूर करण्यात आला आहे.

या ठरावानुसार, पिरंगुट स्थानिक मुस्लीम बांधव वगळता परप्रांतिय, व्यवसायानिमित्त पंचक्रोशी आणि आजूबाजूच्या गावातील मुस्लीम बांधवांना मशिदीत प्रवेश करण्यास आणि प्रार्थनेसाठी येण्यास बंदी घालण्यात आली आहे.

ग्रामपंचायतीत झालेल्या बैठकीदरम्यान विशेष सभेत घेतलेल्या निर्णयानुसार, गावातील कायदा सुव्यवस्था आणि शांतता राखण्यासाठी तसेच मशिदीच्या क्षमतेपेक्षा बाहेरील बांधवांचा अनावश्यक भार टाळण्यासाठी हा निर्णय घेतला गेला आहे.

पिरंगुटच्या ग्रामपंचायतीने जाहीर सूचना असं लिहिलेल्या बोर्डवरचा मसुदा खालील प्रमाणे:

"पिरंगुट गावामध्ये बाहेरून येणार्‍या सर्व मुस्लीम बांधवांना कळवण्यात येते की, समस्त गावकरी मंडळी, पिरंगुट आणि स्थानिक मुस्लीम बांधव यांच्या विशेष सभेमध्ये झालेल्या ठरावानुसार गावातील मशिदीत प्रवेश फक्त स्थानिक मुस्लीम बांधवांसाठीच ठेवण्यात येईल. परप्रांतीय, पंचक्रोशी आणि इतर आजूबाजूच्या गावातील मुस्लीम बांधवांच्या सुरक्षिततेसाठी आणि कायदा सुव्यवस्थेसाठी हा निर्णय घेतला गेला आहे."

या ठरावाच्या खाली समस्त गावकरींचा उल्लेख करण्यात आला असून, हा निर्णय ग्रामपंचायतीच्या हॉलमध्ये घेतलेल्या बैठकीत मंजूर करण्यात आला आहे.