पुणे जिल्ह्यात विद्यार्थ्यांच्या सुरक्षेचा प्रश्न पुन्हा ऐरणीवर आला आहे. एसएससी परीक्षा केंद्रात विद्यार्थ्यावर कोयत्याने हल्ला झाल्याची धक्कादायक घटना ताजी असताना शिरूरमधून धक्कादायक घटना उघडकीस आली आहे. पु्ण्याच्या शिरूर तालुक्यातील दहिवडीमध्ये सहावीतील विद्यार्थ्याचा संशयास्पद मृत्यू झाल्याची घटना घडली आहे. विद्यार्थ्याच्या संशयास्पद मृत्यू झाल्याने संपूर्ण परिसरात हादरला आहे. या घटनेने पालकांमध्ये भीती निर्माण झाली आहे.

पुण्याच्या शिरूर तालुक्यातील दहिवडी येथे सहावीतील विद्यार्थ्याचा संशयास्पद मृत्यू झालाय. साई मांजरे असं मृत मुलाचं नाव आहे. तो तळेगाव ढमढेरे येथील शाळेत शिक्षण घेत होता. हा मृत्यू नेमका हत्या आहे की घातपात, याबाबत अद्याप स्पष्टता झालेली नाही. या घटनेची माहिती मिळताच घटनास्थळी पोहोचून पोलीस आणि वनविभागाच्या टीमकडून कसून तपास सुरू आहे.

एकीकडे परीक्षा केंद्रात हल्ला आणि दुसरीकडे अल्पवयीन मुलाचा संशयास्पद मृत्यू… या सलग घटनांमुळे पालकांमध्ये भीतीचं वातावरण निर्माण झालं आहे. विद्यार्थ्यांची सुरक्षितता हा मोठा प्रश्न निर्माण झाला आहे. ग्रामस्थांनी या प्रकरणाचा अवघ्या काही तासांत उलगडा करून दोषींवर कठोर कारवाई करण्याची मागणी केली आहे.

वाघोलीत विद्यार्थ्यावर कोयत्याने जीवघेणा हल्ला

तत्पूर्वी, पुण्याच्या वाघोलीत चहा पिण्यासाठी थांबलेल्या एका विद्यार्थ्यावर अचानक कोयत्याने जीवघेणा हल्ला झाल्याची घटना घडली होती. आरोपीने मारलेला कोयता थेट विद्यार्थ्याच्या डोक्यातच अडकून राहिला होता. या रक्तरंजित हल्ल्याचा संपूर्ण थरार परिसरातील सीसीटीव्ही कॅमेऱ्यात कैद झालाय. हा थरार वाघोलीतील रायसोनी कॉलेजसमोर घडला. जुन्या वादातून हा वाद झाल्याचे सांगण्यात येत आहे. या हल्ल्यात पीडित नागेश जगतापच्या डोक्यावर, पाठीवर आणि शरीरावर गंभीर वार झाले आहेत. त्यांच्यावर रुग्णालयात उपचार सुरू आहेत.