अक्षय बडवे, पुणे

पुण्यातील ५० शाळा अनधिकृत असल्याची माहिती समोर आली होती. पुणे शहरातील १४, जिल्ह्याच्या ग्रामीण भागातील २५ आणि पिंपरी चिंचवडमधील ११ शाळांचा यामध्ये समावेश आहे. या अनधिकृत शाळांमुळे विद्यार्थ्यांचे भवितव्य धोक्यात आले आहे. अशामध्ये आता नवीन माहिती समोर आली आहे. या ५० शाळांपैकी ४९ शाळा या इंग्रजी माध्यमांच्या आहेत. या शाळांविरोधात कारवाई केली जाणार आहे, अशी माहिती पुणे जिल्हा परिषदेचे (Pune zilla parishad) मुख्य कार्यकारी अधिकारी संतोष पाटील यांनी दिली आहे.

संतोष पाटील यांनी दिलेल्या माहितीनुसार, पुण्यातील ४९ अनधिकृत शाळा या इंग्लिश माध्यमांच्या आहेत. पुणे शहर आणि जिल्ह्यात ४५ शाळा बेकायदेशीर आहेत आणि ४ नियमबाह्य आहेत. नोटीस बजावल्यानंतर जर शाळा सुरू राहिल्या तर या शाळेला प्रत्येकी १ लाख रुपयांचा दंड आकारला जाईल. त्यानंतर देखील शाळा सुरू राहिली तर प्रतिदिनी १० हजार रुपये असा दंड आकारला जाईल.

अनधिकृत शाळांमध्ये शिकणाऱ्या विद्यार्थ्यांच्या शिक्षणाचे पुढे काय असा प्रश्न निर्माण झाला होता. यावर बोलताना संतोष पाटील यांनी सांगितले की, 'विद्यार्थ्यांना शेजारच्या शाळेत ट्रान्स्फर केले जाणार आहे. ज्या पालकांनी फी भरली आहे. त्यांच्या पाल्यांना शासकीय शाळांमध्ये ट्रान्स्फर केले जाईल.' तसंच, 'कोणत्याही विद्यार्थ्यांचे शैक्षणिक नुकसान होणार नाही.', अशी ग्वाही देखील जिल्हा परिषदेकडून देण्यात आली आहे.

तसंच, 'पुण्यातील ४९ अनधिकृत शाळा या इंग्रजी माध्यमांच्या आहेत. जिल्हा परिषदेकडून सर्व शाळांचे सर्वेक्षण करण्यात येत आहे. ज्या शाळांना मान्यता नाहीये त्यांना नोटीस बजावली जाणार आहे. कारवाई करून सुद्धा शाळा बंद केल्या नाहीत तर फौजदारी गुन्हा दाखल केला जाणार आहे.' असे देखील संतोष पाटील यांनी सांगितले.