अक्षय बडवे, प्रतिनिधी...

Pune Accident News: पुण्यामधील फर्ग्युसन रस्त्यावर भरधाव लॅम्बोर्गिनी मोटारीने एका भटक्या श्वानाला धडक दिल्याने श्वानाचा मृत्यू झाल्याची घटना मागच्या आठवड्यात घडली होती. सोमवार (७, ऑगस्ट) फसीरोडवरील नामदार गोपाळ कृष्ण गोखले चौकात ही अपघाताची घटना समोर आली होती. या संदर्भात भगधाव वेगात गाडी चालवणाऱ्या तरुणावर गुन्हाही नोंद झाला होता. या प्रकरणात आता मनसे नेते वसंत मोरे यांनी उडी घेत मृत श्वानाची श्रद्धांजली सभाआयोजित केली आहे.

याबाबत अधिक माहिती अशी की, पुण्यातील (Pune) गुडलक चौकात भरधाव गाडीने धडक दिल्याने श्वानाचा मृत्यू झाला होता. या घटनेची मनसेचे (MNS) नेते वसंत मोरे (Vasant More) यांनी गंभीर दखल घेतली आहे. फेसबूक पोस्ट करत त्यांनी या घटनेवर संताप व्यक्त केला असून त्या तरुणाला धडा शिकवणार असल्याचेही म्हणले आहे.

वसंत मोरेंची पोस्ट..

त्याचं झालं असं 5 ऑगस्ट ला दु. 2 वाजता पुण्यातील गुडलक चौकात डॉन रस्त्याच्या कडेला नेहमीप्रमाणे झोपला होता. आणि अचानक पुण्यातील एका नामांकित सोन्याच्या दुकानाच्या मालकाच्या जहागीरदार पोराची 4 कोटी रुपयांची लिंबोर्गीनी गाडी आली.

"ह्या मोठ्या बापाच्या लेकाने त्याला त्याच्या गाडीच्या डाव्या बाजूच्या चाकाखाली घेतला थोडा थांबला असता तर कदाचित डॉन वाचला ही असता पण या मोठ्या बापाच्या औलादीने गाडी तशीच पुढे रेटली आणि डॉन चा जीव घेतला.." अशा शब्दात त्यांनी संताप व्यक्त केला आहे. तसेच याला धडा शिकवणारचं असेही ते म्हणाले आहेत.

दरम्यान, या प्रकरणात कारचालक इन्फ्लुएन्सर तरुण प्रसार नगरकर (Prasad Nagarkar) विरोधात तक्रार दाखल करण्यात आली आहे. "आम्ही शनिवारी सीसीटीव्ही फुटेज तसेच एफआयआरमध्ये नमूद केलेल्या वाहन क्रमांकाच्या आधारे त्याला अटक केली. आम्ही त्याची कारही ताब्यात घेतली आहे. नंतर त्याला जामीनावर सोडून देण्यात आल्याचे सांगितले आहे. (Latest Marathi News)