Pune News : पुण्यामध्ये महाराष्ट्र मोटार वाहन विभागातर्फे ३१ जानेवारी ते २ फेब्रुवारी या कालावधीत राज्यस्तरीय रस्ता सुरक्षा क्रीडा व सांस्कृतिक अभियान २०२५ चे आयोजन करण्यात आले आहे. या अनुषंगाने या कालावधीत वाहन योग्यता प्रमाणपत्र नूतनीकरण (Vehicle fitness certificate renewal) आणि पक्की अनुज्ञप्ती चाचणीच्या (Fixed License Test) तारखांमध्ये बदल करण्यात आले आहेत.

राज्यस्तरीय रस्ता सुरक्षा क्रीडा व सांस्कृतिक अभियानाचे पुण्यातील श्री शिवछत्रपती क्रीडा संकुल, बालेवाडी येथे आयोजन करण्यात आले आहेत. या कार्यक्रमासाठी राज्यभरातून मोठ्या प्रमाणात मोटर वाहन विभागाचे खेळाडू सहभागी होणार आहेत. त्यामुळे गाड्यांची फिटनेस सर्टिफिकेट रिन्यूव्हल आणि चालकांची ड्रायव्हिंग लायसन्स टेस्ट पुढे ढकलण्यात आली आहे.

वाहनांच्या योग्यता प्रमाणपत्र नूतनीकरणासाठी ज्या वाहन चालकांना ३१ जानेवारी - शुक्रवार हा दिवस आरक्षित करुन दिला होता. त्यांना पुढच्या आठवड्यात शनिवारी (८ फेब्रुवारी) सर्टिफिकेट रिन्यूव्हल करण्यासाठी जावे लागणार आहे. ८ फेब्रुवारी रोजी वाहने निरीक्षणाकरीता सादर करावी लागणार आहेत.

शिकाऊ व पक्क्या लायसन्ससाठी ३१ जानेवारी पूर्वनियोजित वेळ घेतलेल्यांच्या वेळेमध्ये बदल करण्यात आले आहे. या उमेदवारांना ३ ते ७ फेब्रुवारी या कालावधीत ड्रायव्हिंग लायसन्ससाठी हजर राहावे लागणार आहे. चाचणीच्या तारखेमधील बदलांची माहिती पिंपरी चिंचवड प्रादेशिक परिवहन अधिकारी कार्यालयाने प्रसिद्ध केली आहे.