पुण्यातील नवले पुलावर गुरुवारी म्हणजे १३ नोव्हेंबर रोजी भीषण अपघात झाला. कंटेनरवरचा चालकाचा ताबा सुटल्याने कंटेनर पुढे असलेल्या गाड्यांना धडकला. या भीषण अपघातानंतर या गाडीने पेट घेतला. या दुर्घटनेत ८ जणांचा मृत्यू झाला, तर १५ जण जखमी झाले. त्यानंतर या पुलावर मानवतेला काळिमा फासणारी घटना घडली. पुणेकरांनी या अपघातादरम्यान रस्त्यावर पडलेले काही पैसे आणि सोनं लुटल्याचा व्हिडिओ व्हायरल होत आहे.

एकीकडे ८ जणांना मृत्यूने कवटाळलं तर दुसरीकडे पुण्यातील नागरिकांनी अमानुषपणाचा कहर केला. व्हायरल व्हिडिओनुसार, नवले पुलावर अपघात झाल्यानंतर अपघातातील मृतांचे आणि जखमींचे सामान, दागिने, पैसे सर्वत्र पसरले. अपघातादरम्यान मोठ्या प्रमाणावर पुलावर बघ्यांची गर्दी जमली. या पैकी काही जणांनी रस्त्यावर पडलेलं सोनं, पैसे उचलून स्वतःच्या खिशात घातले. या व्हायरल झालेल्या व्हिडिओमधून अमानवी कृत्याचे दर्शन घडते आहे.

पुण्यात गुरुवारी संध्याकाळच्या सुमारास भीषण अपघात घडला. पुण्यातील कात्रज बोगदा ओलांडल्या नंतर एका कंटेनर चा ब्रेक फेल झाला आणि चालकाचे वाहनावरचे नियंत्रण सुटल्यामुळे त्याने रस्त्यात येणाऱ्या ८ ते १० वाहनांना धडक दिली. पुढे एका कंटेनरला धडक देण्यापूर्वीच त्याच्या समोर असलेल्या चारचाकी वाहनाला धडक दिल्यामुळे ते वाहन दोन्ही कंटेनरच्या मध्यभागी सापडलं आणि अग्नितांडव झाला.

घटनास्थळी आगीचे लोण दूरपर्यंत पोहचले. तातडीने पोलिसांनी, अग्निशमन दलाच्या जवानांनी घटनास्थळी धाव घेतली तर दुसऱ्या बाजूला स्थानिकांकडून आगीवर नियंत्रण मिळवण्याचे प्रयत्न सुरू होते. मात्र अपघात इतका भयानक होता की मध्यभागी अडकलेल्या चारचाकीचा चक्काचूर झाला होता. व्हायरल झालेल्या या विडिओवर नेटकऱ्यांनी संतप्त प्रतिक्रिया दिली आहे.