सागर आव्हाड, साम टीव्ही

मुंबईनंतर पुण्यात मोठा राडा झाला आहे. पुण्यात शिंदे गटाचे उमेदवार नाना भानगिरे आणि सारिका पवार यांच्यावर हल्ला झालाय. अज्ञातांनी त्यांच्या कारवर दगडफेक केल्याची घटना समोर आली आहे. या हल्ल्यात सारिका पवार या जखमी झाल्या आहेत. दुसरीकडे वडगाव शेरीत दोन गटात दगडफेक झाल्याची घटना घडली आहे. या घटनेने पुण्यातील महापालिका निवडणुकीला गालबोट लागलं आहे.

पुणे शहरात महापालिकेच्या निवडणुकीसाठी रणधुमाळी सुरू असताना सर्वच पक्षांकडून जोरदार प्रचार करण्यात येत आहे. सत्ताधारी आणि विरोधकांकडून एकमेकांवर आरोप होताना पाहायला मिळत आहे. या निवडणुकीच्या रणधुमाळीदरम्यान पुण्यात धक्कादायक घटना घडली असून पुण्यातील शिवसेनेचे शहराध्यक्ष नाना भानगिरे आणि प्रभाग क्रमांक 41 चे शिवसेनेचे उमेदवार सारिका पवार यांच्यावर अज्ञात व्यक्तींनी हल्ला केला आहे. त्यांच्या कारवर दगडफेक करण्यात आली आहे.

प्रभाग क्रमांक 41 मध्ये शिवसेनेचे उमेदवार सारिका पवार हे प्रचार करत असताना यांच्यावर काही हल्लेखोरांनी हल्ला केला. या हल्ल्यात त्या जखमी झाल्या आहेत. तर शिंदे गटाचे शहराध्यक्ष नाना भानगिरे हे देखील प्रचाराला गेले असताना त्यांच्या कारवर दगडफेक करण्यात आली आहे. घटनास्थळी पोलीस दाखल झाले असून पोलिसांकडून याबाबत चौकशी सुरू आहे. तसेच शिवसेनेच्या शहराध्यक्ष नाना भानगिरे यांच्याकडून देखील तक्रार दाखल करण्याचा काम सुरू आहे.

वडगाव शेरीत दोन गटात दगडफेक

निवडणुकांच्या पार्श्वभूमीवर वडगाव शेरी विधानसभा मतदारसंघातील सोपाननगर परिसरात काल रात्री उशिरा तरुणांच्या दोन गटांमध्ये दगडफेक आणि मारामारीची घटना समोर आली आहे. या घटनेचा व्हिडिओ सध्या सोशल मीडियावर मोठ्या प्रमाणात व्हायरल होत आहे. व्हायरल व्हिडिओमध्ये काही तरुण एकमेकांवर दगडफेक करताना दिसत आहे. रस्त्यावर प्रचंड गोंधळाचे दृश्य पाहायला मिळत आहे.

या घटनेनंतर परिसरातील नागरिकांमध्ये भीतीचे वातावरण पसरले आहे. त्यामुळे भयमुक्त आणि दहशतमुक्त वडगाव शेरीची मागणी जोर धरू लागली आहे.निवडणुकीच्या काळात अशा प्रकारामुळे कायदा आणि सुव्यवस्थेचा प्रश्न निर्माण झाला आहे. या घटनेप्रकरणी पोलीस काय कारवाई करणार, याकडे नागरिकांचे लक्ष लागले आहे.