राज्यात काही दिवसांपासून पावसाने दडी मारली असून ऊन सावल्यांचा लपंडाव पाहायला मिळत आहे. दरम्यान २० जुलै नंतर पावसाची शक्यता असून पुढे काही दिवस नागरिकांना उकाड्याला सामोरे जावं लागणार आहे. अशातच आता पुणेकरांना पुन्हा एकदा पाणीटंचाईचा सामना करावा लागणार आहे. पुणे महापालिकेने उद्यापासून शहरात दिवसाआड पाणीपुरवठा करण्याचा निर्णय घेतला आहे. आषाढी वारीच्या पार्श्वभूमीवर काही दिवसांसाठी पाणीकपात मागे घेण्यात आली होती. मात्र, धरणांमधील समाधानकारक पाणीसाठा न झाल्याने पुन्हा पाणीकपात लागू करण्यात येणार आहे.

यंदा मान्सूनच्या सुरुवातीच्या टप्प्यात अपेक्षित प्रमाणात पाऊस न झाल्याने पुण्याला पाणीपुरवठा करणाऱ्या खडकवासला धरण प्रकल्पातील चारही धरणांमधील पाणीसाठ्यावर परिणाम झाला आहे. हवामान विभागानेही यंदा काही भागांत सरासरीपेक्षा कमी पाऊस पडण्याचा अंदाज व्यक्त केला आहे. त्यामुळे खडकवासला धरण प्रकल्प १०० टक्के भरत नाही, तोपर्यंत पाणीकपातीची अंमलबजावणी सुरू ठेवण्याचा निर्णय प्रशासनाने घेतला आहे.

पुणे शहरात ९ आणि १० जुलै रोजी संत ज्ञानेश्वर महाराज आणि संत तुकाराम महाराज यांच्या पालखी सोहळ्याचा मुक्काम होता. या काळात लाखो वारकरी पुण्यात दाखल होत असल्याने नागरिकांना आणि वारकऱ्यांना पुरेसा पाणीपुरवठा मिळावा यासाठी महापालिकेने १२ जुलैपर्यंत पाणीकपात स्थगित केली होती. मात्र, आता परिस्थितीचा आढावा घेतल्यानंतर पुन्हा दिवसाआड पाणीपुरवठा करण्याचा निर्णय घेण्यात आला आहे.

अर्धा जुलै महिना संपत आला असताना पुण्याला पाणीपुरवठा करणाऱ्या खडकवासला, पानशेत, वरसगाव आणि टेमघर या चारही धरणांमध्ये मिळून केवळ ५७.८५ टक्के पाणीसाठा उपलब्ध आहे. गेल्या वर्षी याच दिवशी हा साठा ७२.८९ टक्के होता. म्हणजेच यंदा धरणांमधील पाणीसाठा सुमारे १५ टक्क्यांनी कमी आहे. सध्या खडकवासला धरणात ९३.३१ टक्के, पानशेतमध्ये ६०.६३ टक्के, वरसगावमध्ये ५५.४१ टक्के आणि टेमघरमध्ये ३९.४३ टक्के पाणीसाठा आहे. विशेषतः टेमघर धरणातील कमी साठ्यामुळे प्रशासनाची चिंता वाढली आहे. महापालिकेने नागरिकांना पाण्याचा काटकसरीने वापर करण्याचे आवाहन केले आहे. पुढील काही दिवसांत धरण क्षेत्रात जोरदार पाऊस झाल्यास परिस्थितीत सुधारणा होऊ शकते. मात्र, तोपर्यंत पुणेकरांना दिवसाआड पाणीपुरवठ्याशी जुळवून घ्यावे लागणार आहे.