पुण्यातील केतन अग्रवाल हत्याप्रकरणात दररोज नवे धक्कादायक खुलासे समोर येत आहेत. सुरुवातीला ही घटना अपघात असल्याचे मानले जात होते. मात्र पोलिसांच्या तपासात हा अपघात नसून नियोजित हत्याकांड असल्याचे उघड झाले आहे. या प्रकरणात केतनची होणारी पत्नी सिया गोयल आणि तिचा कथित बॉयफ्रेंड चेतन यांना अटक करण्यात आली आहे. दरम्यान केतनच्या मृत्यूपूर्वीचे काही व्हिडिओ सध्या सोशल मीडियावर व्हायरल होत आहेत. एका व्हिडिओमध्ये तो सियासोबत आनंदाने वाढदिवस साजरा करताना पाहायला मिळत आहे.

मिळालेल्या माहितीनुसार, १८ जून रोजी सकाळी सिया आणि केतन लोहगड किल्ल्यावर गेले होते. यावेळी केतन सुमारे ४०० फूट खोल दरीत कोसळल्याने त्याचा मृत्यू झाला. घटनेनंतर सियाने पोलिसांना दिलेल्या माहितीत केतनचा पाय घसरल्याने तो दरीत पडल्याचा दावा केला होता. मात्र तपासादरम्यान अनेक संशयास्पद बाबी समोर आल्याने पोलिसांनी या प्रकरणाचा सखोल तपास सुरू केला आणि ही नियोजित हत्या असल्याचे उघडकीस आले.

दरम्यान, या घटनेनंतर सोशल मीडियावर सिया आणि केतन यांचे अनेक व्हिडीओ आणि फोटो व्हायरल होत आहेत. त्यापैकी एक व्हिडीओ विशेष चर्चेत आला आहे. हा व्हिडीओ १८ मे रोजीचा असून सियाच्या वाढदिवसानिमित्त केतनने तिच्यासाठी खास सरप्राईजचे आयोजन केले होते. व्हिडीओमध्ये केतन सियाला फुले देताना, तिच्यासाठी विशेष सजावट करताना आणि रेस्टॉरंटमध्ये वाढदिवस साजरा करताना दिसत आहे. दोघांमधील प्रेम आणि आनंद स्पष्टपणे दिसून येत आहे.

केतनच्या मृत्यूनंतर सियाने तिच्या इन्स्टाग्राम अकाउंटवर भावनिक पोस्टही शेअर केली होती. "तू मला माझ्या वाढदिवशीच सोडून गेलास. आपल्या लग्नाला काहीच महिने उरले होते," असे तिने त्या पोस्टमध्ये लिहिले होते. मात्र आता तपासातून समोर आलेल्या माहितीनंतर या पोस्टकडेही संशयाच्या नजरेतून पाहिले जात आहे. या प्रकरणाचा तपास सध्या सुरू असून पोलिसांकडून अधिक पुरावे गोळा केले जात आहेत. त्यामुळे पुढील काळात आणखी धक्कादायक खुलासे होण्याची शक्यता व्यक्त केली जात आहे.