अक्षय बडवे, प्रतिनिधी...

Pune Fraud News: गेल्या काही दिवसांपासून पुण्यातील आर्थिक फसवणूकीचे अनेक गुन्हे समोर येत आहेत. अशीच एक धक्कादायक घटना समोर आली असून पुणे महानगरपालिकेत नोकरी लावून देतो असे आमिष दाखवत पुण्यातील तीन महिलांची फसवणूक झाल्याचा प्रकार उघडकीस आला आहे.

महानगरपालिकेत माझी बरीच ओळख आहे असे सांगत या तीन महिलांकडून लाखो रुपये उकळल्याचे समोर आले असून या प्रकरणी पुण्यातील सिंहगड रोड पोलीस ठाण्यात तक्रार दाखल करण्यात आली आहे. (Pune Fraud News)

काय आहे संपूर्ण प्रकरण?

याबाबात समोर आलेल्या माहितीनुसार, तक्रारदार महिला ही सिंहगड रोड (Singhgad) या ठिकाणी राहते. तरुणीची एका परिचितामार्फत आरोपी तावडेशी ओळख झाली होती. तावडेने तरुणीला पुणे महापालिकेत नोकरी लावण्याचे आमिष दाखविले होते. ज्याच्या जाळ्यात या तीनही महिला फसल्या.

तक्रारदार तरुणीकडून तिच्या मैत्रिणीकडून आणि आणखी एका महिलेकडून असे एकूण १५ लाख रुपये या भामट्याने उकळले. इतकंच काय तर विश्वास संपादन करण्यासाठी तावडे याने या महिलांना बनावट सर्टिफिकेट देखील तयार करून दिले होते. (Pune Latest News)

त्या तरुणीने जेव्हा तावडेकडे पुढच्या गोष्टींसाठी विचारणा केली. मात्र त्याने उडवा उडवीची उत्तरे द्यायला सुरुवात केली. या संपूर्ण प्रकारानंतर महिलांना आपली फसवणूक झाली आहे असे लक्षात आले. ज्यानंतर त्यांनी सिंहगड पोलिसांत धाव घेतली.

या घटनेची पोलिसांनी गंभीर दखल घेतली असून पोलिस आशिष तावडे या आरोपीचा शोध घेत आहेत. तसेच त्याने आणखी किती महिलांना फसवले आहे याचाही तपास सुरू आहे. (Latest Marathi News)