मावळ तालुक्यातील एका गावातून अल्पवयीन मुलगी बेपत्ता झाल्यानंतर तिच्या कुटुंबीयांनी वडगाव मावळ पोलीस ठाण्यात तक्रार दाखल केली. पोलिसांकडून मुलीचा शोध सुरू असतानाच ती पुण्यातील बिबवेवाडी परिसरात एका तथाकथित भोंदू बाबाच्या मठात आढळून आल्याने परिसरात एकच खळबळ उडाली. 10 वीला चांगले मार्क मिळवून देतो, असं सांगून भोंदूनं 14 वर्षीय अल्पवयीन मुलीचं लैंगिक शोषण केलंय.

याप्रकरणी भोंदूबाबा स्वप्नील लांडेविरोधात गुन्हा दाखल केला असून सध्या तो फरार असल्याची माहिती आहे. महत्त्वाचं म्हणजे, या घटनेनंतर पीडित मुलीचे समुपदेशन करण्यात आलंय. या घडलेल्या प्रकरणाबाबत पीडितेच्या वकिलांनी काय म्हटलंय ते पाहूयात...

आरोपी लांडेनं अशाच पद्धतीने धर्माचा आणि चमत्कारांचा धाक दाखवून आणखी कोणाची आर्थिक फसवणूक किंवा लैंगिक शोषण केले आहे का, याचा शोध पोलिसांकडून सुरूये. खरंतर, ही एकच घटना नाहीये तर पुण्यातच आणखीन एका भोंदू बाबाचा व्हिडिओ व्हायरल झालाय. भक्त पाय धुवून पाणी पितानाचा व्हिडिओ सोशल मीडियावर व्हायरल होतोय. त्यामुळे पुण्यात भोंदूबाबांनी चांगलाच उच्छाद मांडल्याचं दिसतंय. कितीही कडक कारवाई झाली तरी बाबांची भोंदूगिरी काही थांबत नाही. त्यामुळे नागरिकांनीही अशा बाबांपासून सावधगिरी बाळगण्याची गरज आहे.