Pune Accident : पुण्यात ड्रिंक अँड ड्राइव्हची घटना घडली आहे. ही घटना पुण्याच्या बालगंधर्व रंगमंदिराजवळ घडली आहे. एका मद्यधुंद कारचालकाने दुचाकीस्वाराला धडक दिली आणि त्यानंतर वाहन थेट दुभाजकावर चढवले. दुभाजकाला धडक लागल्याने वाहनाचा अक्षरशः चेंदामेंदा झाला. परवाना नसताना चालक वाहन चालवत असल्याचे म्हटले जात आहे.

मिळालेल्या माहितीनुसार, पुण्यातील बालगंधर्व रंगमंदिराच्या समोर हा अपघात घडला. धाराशिवच्या चालकाने वाहन परवाना नसताना दुचाकीला धडक मारली. त्यानंतर वाहन रस्त्याच्या दुभाजकावर चढवले. या प्रकरणी डेक्कन पोलिसांकडून कार चालकावर ड्रिंक अँड ड्राईव्हचा खटला दाखल करण्यात आल्याची माहिती समोर आली आहे.

अनिकेत रमाकांत सोनटक्के (वय २५, चाकण, धाराशिव) असे या कारचालकाचे नाव आहे. ही घटना शनिवारी (४ ऑक्टोबर) संध्याकाळी ७ वाजता पुण्यातील बालगंधर्व रंगमंदिर येथील विठ्ठल रामजी शिंदे पुलाजवळ घडली. शिक्षणासाठी पुण्यात आलेल्या सोनटक्केने सायंकाळी गर्दीच्या वेळी भरधाव वाहन चालवत दुचाकीस्वाराला धडक दिली आणि त्यानंतर वाहन पुढे छत्रपती शिवाजीनगर परिसरातील दुभाजकावर चढवले.

याबाबत डेक्कन पोलिसांनी दिलेल्या माहितीनुसार, या वाहन चालकाने आधी बालगंधर्व रंगमंदिरजवळ एका दुचाकीला धडक दिली, यात दुचाकीस्वार किरकोळ जखमी झाला. या तरुणाने माझी काही नुकसान झाले नाही, म्हणून तक्रार देण्यास नकार दिला आहे. काही अंतरावर असलेल्या एका दुभाजकावर वाहन चढवल्याने वाहनाचा मोठे नुकसान झाले. सोनटक्के याच्यावर डेक्कन पोलिस ठाण्यात ड्रिंक अँन्ड ड्राईव्हचा खटला भरण्यात आला आहे.