Pune Crime : रागाने पाहिलं म्हणून तरुणाची हत्या, कोयत्याने केले सपासप वार; पुण्यात भयंकर घडलं

Pune : पुण्यातून मधून एक धक्कादायक प्रकार समोर आला आहे. रागाने पाहिल्याने एका तरुणाची निर्घृणपणे हत्या करण्यात आली. कोयत्याने सपासप वार करत आरोपींनी तरुणाला संपवले. आरोपी आणि मृतक यांच्यामध्ये पूर्ववैमनस्य होते असेही म्हटले जात आहे. या प्रकरणी दापोडी पोलिसांनी दोघांना अटक केली आहे. आरोपींना न्यायालयाने पोलीस कोठडी सुनावली आहे.

मिळालेल्या माहितीनुसार, ३ ऑक्टोबर रोजी पिंपरी चिंचवडच्या दापोडी येथील जय भवानी मित्र मंडळासमोरच्या रस्त्यावर रात्री अकराच्या सुमारास हत्येची घटना घडली. मृत तरुणाचे नाव शेखर भालेराव (वय २४ वर्षे) असे आहे. तरुणाच्या वडिलांनी या प्रकरणी दापोडी पोलीस ठाण्यात फिर्याद दाखल केली होती. त्यानंतर पोलिसांनी गौरव गायकवाड आणि अजय खरात यांना अटक केली.

सुमारे दोन वर्षांपूर्वी संशयित गौरव आणि अजय यांच्यासोबत मृतक शेखरचे भांडण झाले होते. त्यांच्यामध्ये किरकोळ गोष्टींवरुन वाद होत असे. ८ दिवसांपूर्वी रागाने बघितल्याने त्यांच्यामध्ये वाद झाला होता. यामुळे गौरव, अजय आणि त्यांच्या साथीदारांनी शेखरची हत्या केल्याचे म्हटले जात आहे. आरोपींनी बेसावध शेखरच्या डोक्यावर आणि पाठीवर कोयत्याने वार केले.

जीवघेणा हल्ला झाल्यानंतर शेखरला रुग्णालयात दाखल करण्यात आले होते. पण त्याचा मृत्यू झाला. या प्रकरणी शेखरच्या वडिलांनी गौरव, अजय यांच्यासह आणखी तिघांवर संशय व्यक्त केला आहे. पोलिसांनी अजय आणि गौरव यांना घटना घडल्यानंतर लगेच अटक करुन न्यायालयात हजर केले. दोघांना पोलीस कोठडी सुनावण्यात आली आहे. या प्रकरणात आणखी कोण-कोण सहभागी आहे याचा पोलीस तपास करत आहेत.