पुणे : पुण्यातील दौंडच्या यवतमध्ये सोशल मीडियावरील एका आक्षेपार्ह पोस्टवरून दोन गटात मोठा राडा झाला. या घटनेनंतर परिसरात तणावाचे वातावरण निर्माण झालं आहे. एका गटाने रस्त्यावर उतरून दुचाकी पेटवून दिल्या आहेत. तर यवतचा आठवडा बाजार देखील बंद करण्यात आला आहे.

मिळालेल्या माहितीनुसार, पुणे जिल्ह्यातील दौंड तालुक्यातील यवतमध्ये शुक्रवारी सकाळी एका गटाच्या व्यक्तीने सोशल मीडियावर आक्षेपार्ह पोस्ट केली. त्यानंतर दुपारी बारानंतर यवतमध्ये दोन गट भिडले. या वादानंतर यवतमधील आठवडे बाजार बंद करण्यात आला. तर दुसरीकडे यवतमध्ये काही दुचाकी गाड्या पेटवून देण्यात आल्या आहेत. आक्षेपार्ह पोस्ट करणाऱ्या व्यक्तीला यवत पोलिसांनी ताब्यात घेतल्याची माहिती यवतचे पोलीस निरीक्षक नारायण देशमुख यांनी दिली आहे.

या प्रकारामुळे यवत गावात तणावाचे वातावरण निर्माण झालं आहे. तणावाच्या पार्श्वभूमीवर यवत पोलिसांनी या भागात पोलीस बंदोबस्त वाढवला आहे. यवतमधील नीलकंठेश्वर मंदिरात शनिवारी 26 जुलै रोजी छत्रपती शिवाजी महाराज यांची पुतळ्याची विटंबना केल्याची घटना घडली होती. त्यानंतर आज झालेल्या या प्रकारामुळे यवत परिसरात तणावाचे वातावरण आहे.

सोशल मीडियावर पोस्ट करणारा युवक यवत भागातील सहकार नगर भागात राहतो. स्थानिक कार्यकर्त्यांनी सहकार नगर भागात धाव घेत त्याच्या घराची तोडफोड देखील केली आहे. पोलिसांनी वेळीच हस्तक्षेप केल्याने पुढील अनर्थ टळला आहे. या तणावामुळे यवत भागात तणावाचे वातावरण निर्माण झाले आहे.