सचिन जाधव, पुणे

पुण्यामध्ये ९ वर्षांच्या दोन अल्पवयीन मुलींवर बलात्कार केल्याची धक्कादायक घटना समोर आली आहे. या घटनेमुळे पुन्हा एकदा पुणे हादरले आहे. पहिली घटना धनकवडीमध्ये घडली तर दुसरी घटना कोंढव्यामध्ये घडली आहे. याप्रकरणी सहकारनगर आणि कोंढवा पोलिस ठाण्यात पोक्सो कायद्यान्वये विनयभंग आणि बलात्कार प्रकरणी गुन्हे दाखल करण्यात आले आहेत. धक्कादायक बाब म्हणजे एका घटनेत सावत्र भावानेच आपल्या बहिणीवर बलात्कार केला.

पुण्याच्या सहकारनगर पोलिस ठाण्याच्या हद्दीतील धनकवडीमध्ये एका ९ वर्षांच्या मुलीवर तरुणाने लैंगिक अत्याचार केले. पीडित मुलीसोबत अश्लील कृत्य करून तिला जीवे मारण्याची देखील धमकी देण्यात आली. याप्रकरणी पीडित मुलीच्या आईने दिलेल्या तक्रारदारावरून धनकवडी येथे राहणाऱ्या २१ वर्षीय तरुणाविरोधात सहकारनगर पोलिस ठाण्यामध्ये गुन्हा दाखल करण्यात आला आहे.

तर दुसरी घटना कोंढवा खुर्द परिसरात घडली. एका ९ वर्षांच्या मुलीवर तिच्या सतरा वर्षांच्या सावत्र भावाने लैंगिक अत्याचार केले. या प्रकरणी पीडित मुलीच्या आईने दिलेल्या तक्रारीवरून सावत्र भावाविरोधात कोंढवा पोलिस ठाण्यात गुन्हा दाखल करण्यात आला आहे. या घटनेमुळे कोंढव्यामध्ये खळबळ उडाली आहे. पोलिस या प्रकरणाचा तपास करत आहेत.

दरम्यान, विशेष मुलीशी अश्लील कृत्य करणाऱ्याला सक्तमजुरीची शिक्षा सुनावण्यात आली आहे. अल्पवयीन मुलीशी अश्लील चाळे आणि विनयभंग करणाऱ्या परप्रांतीय तरुणाला न्यायालयाने ५ वर्षे सत्ता मजुरी, २ हजार रुपयांचा दंड सुनावला आहे. दंड न भरल्यास अतिरिक्त कारावासाची शिक्षा भोगावी लागेल असे न्यायालयाने सांगितले.

दीपक सुधीर मंडल (२८ वर्षे, राहणार. आसाम) असे शिक्षा झालेल्या आरोपीचे नाव आहे. ७ ऑक्टोबर २०२१ रोजी पीडित घराच्या ओट्यावर बसली होती. त्यावेळी आरोपी तिथे गेला आणि तिला मिठी मारली.आरोपीने अश्लील स्पर्श करत मुलीचा विनयभंग केला होता.