सचिन जाधव

Pune News: राज्यात महिला बेपत्ता होण्याविषयी सध्या राज्यात जोरदार राजकीय आरोप -प्रत्यारोप होत आहेत. अशात पुणे शहरात महिलांवरील अत्याचाराच्या घटनांमध्ये दिवसेंदिवस वाढ होत आहे. महिला अत्याचाराच्या दररोज सरासरी ९ घटना शहरातील वेगवेगळ्या पोलिस ठाण्यांमध्ये दाखल होत असून,त्याकडे मात्र सर्वांचे दुर्लक्ष होताना दिसत आहे. (Crime News)

त्यात प्रामुख्याने विवाहित स्त्रीला क्रूर वागणूक देणे, बलात्कार, विनयभंग आणि अपनयन, अपहरण अशा घटनांचा समावेश आहे. मे महिन्यातील २० दिवसांत महिलांबाबत वेगवेगळ्या १७५ घटना पोलिसांकडे दाखल झाल्या आहेत. या वर्षातील चार महिन्यांत खून, खुनाचा प्रयत्न, दरोडा, दरोड्याची तयारी, जबरी चोरी, सोनसाखळी चोरी, घरफोडी, गर्दी - मारामारी अशा ५६८ गुन्ह्यांची नोंद शहर पोलिस दलात झाली होती.

त्याचवेळी महिलांविषयक ७९५ गुन्हे दाखल झाल्याचे दिसून येत आहे. सोमवारी वाळूज येथे देखील महिलेवरील अत्याचाराची एक मोठी घटना समोर आली. गुन्हेगाराची माहिती पोलिसांना देत असल्याच्या संशयावरून एका चाळीस वर्षीय महिलेस मारहाण करून अत्याचार केल्याची घटना उघडकीस आली आहे. याप्रकरणी आठ जणांविरुद्ध वाळूज पोलीस ठाण्यात गुन्हा दाखल करण्यात आला आहे. पीडित महिला कुटुंबासह वाळूज परिसरात वास्तव्यास होती.

काही दिवासांपूर्वी नाशकात देखील अशीच एक विचित्र घटना घडली आहे. येथे विवाहित महिलेवर सामूहिक बलात्कार करून दगडाने ठेचून तिची हत्या करण्यात आली होती. महाराष्ट्राला हादरवणारी ही घटना इगतपुरी तालुक्यातील खंबाळेमध्ये घडली आहे.