पुणे : महाराष्ट्रात अनेक ठिकाणी मान्सूनपूर्व पावसाने थैमान घातलं आहे. अनेक गावांमध्ये मोठ्या प्रमाणात शेतीचं नुकसान होत आहे. मात्र, अशातच दौंडमध्ये भर पावसात चोरट्यांचा धुमाकुळ पाहायला मिळाला आहे. चोरट्यांनी पावसाचा फायदा घेत चोरी केली आहे. इतकंच नाहीतर या हल्ल्यामध्ये एक शेतकरीही जखमी झाला आहे. दौंड तालुक्यातील केडगावमध्ये ही घटना घडली आहे.

घटना नेमकी काय घडली?

केडगावमध्ये शनिवारी रात्री १२ वाजनाच्या सुमारास दौंड तालुक्यातील केडगावमधील मोरे वस्तीवर ५ ते ६ जणांच्या अज्ञात टोळक्याने चोरी करण्याच्या उद्देशाने एका शेतकऱ्यांच्या डोक्यात कोयत्याने वार केले आहेत. यात मोरे वस्तीमधील ६० वर्षीय पोपट मोरे हे शेतकरी गंभीर जखमी झाले आहेत. तर याच परिसरातील देशमुख भागात अशोक देशमुख यांच्या घरी देखील चोरट्यांनी दोन तोळे सोन्याच्या दागिन्यांची चोरी केली आहे.

पोपट मोरे हे आपल्या राहत्या घरासमोर झोपलेले असताना अचानक आलेल्या या चोरट्यांनी पोपट मोरे यांच्यावर कोयत्याने वार केला. तर पोपट मोरे यांचे बंधू बाळासाहेब मोरे यांना देखील चोरट्यांनी गळ्याला चाकू लावत धमकावले. त्यांनी आरडाओरडा केल्यानं चोरटे पसार झाले. यातील जखमी पोपट मोरे यांच्यावर केडगावमधील हॉस्पिटलमध्ये उपचार सुरू असून त्यांची प्रकृती स्थिर आहे.

दरम्यान, या घटनेची माहिती मिळताच घटनास्थळी स्थानिक गुन्हे अन्वेषण शाखेचे पोलीस निरीक्षक अविनाश शिळीमकर यवतचे पोलीस निरीक्षक नारायण देशमुख यांनी भेट दिली आहे.