सचिन जाधव -

पुणे: सोसायटीच्या मेंटनन्सची विचारणा करायला गेलेल्या एका जेष्ठ नागरिकाला माजी नगरसेविकेच्या मुलाकडून जबर मारहाण झाल्याची घटना समोर आली आहे. पुण्यातील वारजे परिसरातील राष्ट्रवादी काँग्रेसच्या (NCP) माजी नगरसेविका लक्ष्मीताई दुधाने यांच्या मुलाने ही मारहाण केली आहे.

समीर दुधाने असं आरोपीचं नाव असून वारजे माळवाडी पोलिस ठाण्यात ( Warje Malwadi Police Station) पंकज जाधव यांच्या तक्रारीवरुन समीरविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, पंकज जाधव हे कर्वेनगर परिसरातील माऊली रेसीडेन्सी मध्ये वास्तव्यास आहेत.समीर दुधाने यांनी ही इमारत बांधली असून इमारतीच्या मेंटेनन्सचे काम त्यांच्याकडेच आहे.

पाहा व्हिडीओ -

समीर यांनी सोसायटीच्या व्हाटस्अॅप ग्रुपवर इमारतीचे कॉमन बिल टाकले होते. बिल जरा जास्त वाटल्याने पंकज यांचे वडील आणि इतर दोन रहिवाशासह विचारणा करण्यासाठी समीर दुधाने यांच्याकडे गेले.

मात्र, बिलासंबंधी विचारणा केल्याचा समीरला राग आला आणि त्याने फिर्यादी यांच्या वडिलांना मारहाण केली. वडिलांना होत असलेली मारहाण सोडवण्यासाठी पंकज गेले असता त्यांना देखील लाथाबुक्यानी मारहाण केली. या घटनेची गंभीर दखल घेत पोलिसांनी गुन्हा दाखल केला असून अधिकचा तपास सुरू करण्यात आला आहे.