सागर आव्हाड, पुणे

पुण्यामध्ये गुन्हेगारीच्या घटना दिवसेंदिवस वाढत चालल्या आहेत. गुन्हेगारांना पोलिसांचा धाक राहिला नसल्याचे चित्र वारंवार पुण्यात पाहायला मिळत आहे. अशामध्ये पुण्यामध्ये ४८ तासांमध्ये ५ हत्येच्या घटना घडल्या. यामुळे पुणे हादरले आहे. पुण्यातील वेगवेगळ्या परिसरामध्ये या घटना घडल्या आहेत. याप्रकरणी गुन्हा दाखल करण्यात आला असून पोलिसांकडून तपास सुरू आहे.

सिंहगड रोड पोलिस स्टेशनच्या हद्दीतील नरे परिसरात गाडीतील पेट्रोल चोरत असल्याच्या संशयावरून चार जणांनी १८ वर्षाच्या तरुणाला बेदम मारहाण केली. लाथाबुक्यांनी, काठी आणि सायकलच्या साखळीने बेदम मारहाण केली. या मारहाणीमध्ये गंभीर जखमी झालेल्या तरुणाचा उपचारादरम्यान मृत्यू झाला.

समर्थ भगत असं या तरुणाचे नाव आहे. याप्रकरणी गौरव कुटे, अजिंक्य गांडले आणि राहुल लोहार या तरुणांविरोधात गुन्हा दाखल करत पोलिसांनी अटक केली. तर सिंहगड रोड पोलिस स्टेशनच्या हद्दीतच मंगळवारी रात्री तीन अल्पवयीन तरुणांनी पूर्व वैमनस्यातून एका तरुणाची हत्या केली केला.

वानवडी पोलिस ठाण्याच्या हद्दीतही असाच प्रकार घडलाय. रामटेक परिसरामध्ये मंगळवारी अल्पवयीन तरुणांनी कोयत्याने वार करत मित्राची हत्या केली. रामटेकडी येथील जामा मस्जिद समोर ही घटना घडली. यश सुनिल घाटे असं हत्या झालेल्या मुलाचे नाव होते. याप्रकरणी पोलिसांनी गुन्हा दाखल करत तिघांना ताब्यात घेतलं.

चौथी हत्येची घटना वाघोली पोलिस स्टेशनच्या हद्दीत घडली. तर पाचवी हत्याची घटना कोंढवा पोलिस स्टेशनच्या हद्दीत घडली. एकाचा डोक्यात सिमेंटचा ब्लॉग घालून हत्या करण्यात आल्याचा प्रकार घडला. या दोन्ही प्रकरणी पोलिसांकडून तपास सुरू आहे. दोन दिवसांमध्ये घडलेल्या या ५ हत्येच्या घटनांमुळे पुणे हादरले आहे.