अक्षय बडवे, पुणे

चालताना धक्का लागला त्यामुळे बघून चालत जा असे म्हटल्याचा राग आल्याने काही तरुणांनी तिघांचे अपहरण केले. अपहरण केल्यानंतर या तिन्ही तरुणांना बेदम मारहाण करत जबरदस्तीने गुगल-पेवरून त्यांच्याकडून पैसे उकळले. ही घटना पुण्यातल्या वाघोली रोड परिसरामध्ये घडली आहे. याप्रकरणी पोलिसांनी ५ जणांविरोधात गुन्हा दाखल करत त्यांना अटक केली आहे. लोणीकंद पोलिस याप्रकरणाचा तपास करत आहेत.

मिळालेल्या माहितीनुसार, वाघोलीमध्ये चालताना धक्का लागला या किरकोळ कारणावरून ५ जणांनी तिघांना जबरदस्ती कारमध्ये बसून त्यांचे अपहरण केले आणि त्यांना बेदम मारहाण केली. त्याचसोबत गुगल पेद्वारे त्यांनी त्यांच्याकडील पैसे लुबाडले. याप्रकरणी वाघोलीमध्ये राहणाऱ्या लोकामन हसमत हश्मी यांनी पोलिस ठाण्यात तक्रार दाखल केली होती. या तक्रारीवरून पोलिसांनी कुमार पवार, नितीन पवार, ओम गव्हाणे, मनोज निंबाळकर आणि विकास कांबळे या ५ जणांविरोधात गुन्हा दाखल केला आणि त्यांना अटक केली.

पोलिसांनी दिलेल्या माहितीनुसार, लोकामन हश्मी, समीर हश्मी आणि विवेक गोस्वामी हे तिघेजण भाजी खरेदी करत होते. यावेळी एका १७ वर्षांचा मुलगा आनंदाने लोकामनच्या खांद्याला धक्का दिला. म्हणून त्याने आनंदाला बघून चालत जा असे सांगितले. या गोष्टी आनंदाला राग आला आणि त्याने त्याच्या साथीदाराच्या मदतीने तिघांना मारहाण करायला सुरुवात केली.

आरोपींनी यावेळी आणलेल्या कारमधून तिघांचे अपहरण करून त्यांना दुसरीकडे नेले. लोकामन याच्याकडून जबरदस्तीने १८ हजार रुपये ऑनलाईन घेतले. यानंतर तिघांना पुन्हा जबर मारहाण करून जीवे मारण्याची धमकी दिली. तसेच एकाचा मोबाईल काढून घेतला. अपहरण करत मारहाण करण्यात आलेल्या तिघांनी देखील पोलिस ठाण्यात धाव घेत तक्रार दाखल केली. पाचही आरोपींविरोधात पोलिसांनी गुन्हा दाखल करत त्यांना अटक केली.