Summary:

• पुण्यामध्ये १५ वर्षीय मुलीवर बलात्कार

• सुरक्षारक्षकाने पीडितेवर अनेक वेळा केला बलात्कार

• पीडित मुलगी ५ महिन्यांची गरोदर

• पोलिसांनी आरोपीविरोधात गुन्हा दाखल केला

सचिन जाधव, पुणे

पुण्यामध्ये १५ वर्षांच्या मुलीवर सुरक्षा रक्षकाने वारंवार बलात्कार केल्याची धक्कादायक घटना समोर आली आहे. २५ वर्षीय आरोपीने जीवे मारण्याची धमकी देत पीडितेसोबत हे भयंकर कृत्य केले. पीडित मुलगी ५ महिन्यांची गरोदर राहिली. या घटनेमुळे पुणे हादरले आहे. या प्रकरणी पुण्याच्या लक्ष्मीनगर पोलिस ठाण्यात सुरक्षारक्षकाविरोधात गुन्हा दाखल करण्यात आला आहे. आरोपी सध्या फरार असून पोलिस त्याचा शोध घेत आहेत.

मिळालेल्या माहितीनुसार, शैलेशकुमार (वय २५ वर्षे) असं आरोपी सुरक्षारक्षकाचे नाव आहे. तो येरवड्यातील जयजवान नगरमध्ये राहतो. शैलेश कुमार हा एका सोसायटीमध्ये सुरक्षारक्षक म्हणून काम करतो. तो तिथेच तळमजल्यावरील रुममध्ये रहात होता. त्याने त्याच बिल्डिंगमध्ये राहणाऱ्या एका १५ वर्षीय मुलीवर बलात्कार केला. जीवे मारण्याची धमकी देत त्याने वारंवार पीडितेवर बलात्कार केला. पीडिता ५ महिन्यांची गरोदर राहिली आहे.

याबाबत पीडित मुलीच्या ४२ वर्षाच्या आईने लक्ष्मीनगर पोलिस ठाण्यात फिर्याद दिली. हा प्रकार १६ नोव्हेंबर २०२५ ते १५ एप्रिल २०२६ दरम्यान सुरु होता. या महिलेने फिर्यादीत त्यांच्या १५ वर्षाच्या मुलीला जीवे मारण्याची धमकी देऊन तिच्यावर आरोपीने लैंगिक अत्याचार केल्याचे सांगितले. कोणाला सांगितले तर मारण्याची धमकी देऊन तिच्यासोबत वारंवार शारीरिक संबंध ठेवले. काही दिवसांपूर्वी तिला त्रास होऊ लागला. तेव्हा तिला आईने ससून रुग्णालयात तपासणीसाठी नेले. डॉक्टरांनी तपासणी केल्यावर ती ५ महिन्यांची गर्भवती असल्याचे दिसून आले.

ससून रुग्णालयातील डॉक्टरांनी याची माहिती लक्ष्मीनगर पोलिसांना दिली. पोलिसांनी महिलेची फिर्याद घेऊन पोक्सो अंतर्गत गुन्हा दाखल केला. याची कुणकुण आरोपी शैलेश कुमारला लागल्याने तो पळून गेला. लक्ष्मीनगर पोलिसांनी आरोपीच्या शोधासाठी पथके तयार केली आहेत. पोलिस आरोपीचा शोध घेत आहेत. सध्या मुलीवर रुग्णालयात उपचार सुरू आहेत. या घटनेमुळे पुण्यात खळबळ उडाली आहे. आरोपीविरोधात कठोर कारवाई करण्यात यावी अशी मागणी नागरिकांनी केली आहे.