सचिन जाधव, पुणे

पुणे जिल्ह्यातील उरुळी कांचन परिसरात मानवतेला काळीमा फासणारी एक अत्यंत धक्कादायक घटना समोर आली आहे. कौटुंबिक वादातून एका पतीने स्वतःच्या पत्नीवर अमानुष अत्याचार करत तिच्या गुप्तांगावर ॲसिड टाकल्याचा गंभीर आरोप करण्यात आला आहे. या हल्ल्यात महिला गंभीर जखमी झाली असून तिच्यावर रुग्णालयात उपचार सुरु आहेत. तसेच जखमी महिलेच्या पती विरोधात गुन्हा दाखल करण्यात आला आहे. या घटनेमुळे परिसरात संतापाची लाट उसळली असून महिलांच्या सुरक्षिततेबाबत पुन्हा एकदा गंभीर प्रश्न निर्माण झाले आहेत.

मिळालेल्या प्राथमिक माहितीनुसार, सदर महिलेचा पती हा तिच्या चारित्र्यावर संशय घेत असल्याचा आरोप करण्यात आला. " तुला दोन मुलीचं, मुलगा होत नाही,” या करणावरून पीडितेला मारहाण देखील करण्यात आली. संबंधित दाम्पत्यामध्ये गेल्या काही दिवसांपासून या कारणांवरून वाद सुरू होते. या वादातूनच संतप्त झालेल्या पतीने पत्नीवर अत्याचार करत तिच्यावर ॲसिड फेकल्याचे पीडित महिलेने आपल्या तक्रारीत नमूद केले आहे. या भीषण प्रकारात महिला गंभीर जखमी झाली असून तिच्या शरीराला मोठी इजा झाली आहे.

धक्कादायक म्हणजे या अमानुष कृत्यानंतर आरोपीने पीडितेला दवाखान्यात उपचारासाठी न घेऊन जाता १५ दिवस घरात कोंडून ठेवण्यात आले. अखेर ९ मे रोजी पती कामावर गेल्यानंतर महिलेने दोन्ही मुलींना सोबत घेतले आणि आपले माहेर गाठले. माहेरी सर्व प्रकार सांगितल्यानंतर नातेवाईकांनी त्यांना उरुळी कांचन पोलीस ठाण्यात आणले. दरम्यान, पोलिसांनी तातडीने त्यांना वैद्यकीय तपासणीसाठी पुणे येथील ससून रुग्णालयात पाठवले, जिथे उपचार घेतल्यानंतर १५ मे रोजी हा गुन्हा नोंदवण्यात आला आहे.

पीडित महिलेच्या तक्रारीवरून पोलिसांनी आरोपी पतीविरुद्ध गंभीर कलमांखाली गुन्हा दाखल केला आहे. पुणे पोलिसांकडून आरोपीची चौकशी सुरू असून या घटनेमागील नेमके कारण काय, याचा शोध घेतला जात आहे. या अमानुष प्रकारामुळे स्थानिक नागरिकांमध्ये प्रचंड संताप व्यक्त केला जात आहे.