अक्षय बडवे, पुणे|ता. १६ एप्रिल २०२४

आयपीएल सामन्यांवर ऑनलाइन सट्टा घेणाऱ्या टोळीला पुण्यातून अटक करण्यात आली आहे. पुणे पोलिसांच्या गुन्हे शाखेने शहरातील उच्चभ्रू भागात ही मोठी कारवाई केली असून या कारवाईत पोलिसांनी दहा सट्टेबाजांना अटक केली आहे.

याबाबत पोलिसांनी दिलेल्या माहितीनुसार, खंडणी विरोधी पथकातील अधिकारी, कर्मचारी कोथरूड (Kothrud) भागात रविवारी गस्तीवर होते. त्यावेळी भुसारी कॉलनी परिसरातील एका सोसायटीमध्ये आयपीएल सामन्यावर ऑनलाइन सट्टा सुरू असल्याची माहिती मिळाली.

याच माहितेच्या आधारे गुन्हे शाखेच्या पथकाने सोसायटीतील सदनिकेत छापा टाकला. या छापेमारीत पोलिसांनी दहा सट्टेबाजांना अटक केली आहे. तसेच त्यांच्या ताब्यातून १६ मोबाईल, दोन लॅपटॉप असा सुमारे सव्वादोन लाख रुपयांचा मुद्देमाल जप्त करण्यात आला आहे.

मुकेशकुमार साहू, देवेंद्र यादव, जसवंत साहू, राहुलकुमार यादव, रोहितकुमार गणेश यादव, दुष्यांत सोनकर, संदीप मेश्राम, अखिलेश ठाकूर, महम्मद इस्माईल सौदागर आणि अमित कैलास शेंडगे अशी अटक केलेल्या आरोपींची नावे आहेत. पोलीस या प्रकरणाचा अधिक तपास करत आहेत.