Pune Crime News:

शहरभरात गणेशोत्सवाचा जल्लोष सुरू असताना पुण्यातून एक संतापजनक प्रकार समोर आला आहे. गणपतीसाठी कमी वर्गणी दिल्याने एका चहावाल्याला बेदम मारहाण केल्याची घटना पुण्यातील कॅम्प परिसरात घडली. याबाबत व्यावसायिक गणेश संतोष पाटणे यांनी तक्रार दाखल केली आहे.

याबाबत अधिक माहिती अशी की, शहरातील कॅम्प परिसरात महात्मा गांधी रोडवर गणेश संतोष पाटणे यांचे श्रीनाथ टी स्टॉल आहे. शनिवार (२३, सप्टेंबर) ला त्यांच्या दुकानावर १५ ऑगस्ट चौकातील गणपती मंडळाचे कार्यकर्ते त्यांच्याकडे वर्गणी मागण्यासाठी आले होते. यावेळी वर्गणीच्या रकमेवरुन कार्यकर्ते आणि गणेश पाटणे यांच्यात वाद झाला.

गणेश पाटणे यांनी गणेशोत्सवासाठी (Ganeshotsav 2023) १५१ रुपयांची वर्गणी घेण्याची विनंती केली परंतु मंडळाचे कार्यकर्ते १००० रुपयांची वर्गणी मागत होते. याच कारणाने त्यांच्यात शाब्दिक बाचाबाची झाली.

हा वाद वाढल्याने आरोपींनी टी स्टॉल चालकास बेदम मारहाण केली तसेच 'तुझा धंदा कसा चालतो तेच बघतो...' अशी धमकीही दिली. या प्रकरणात गणेश पाटणे यांनी लष्कर पोलीस ठाण्यात नीलेश दशरथ कणसे (वय ३९) आणि अविनाश राजेंद्र पंडित (वय ३२) यांच्याविरोधात तक्रार दाखल केली आहे. पोलीस याबाबतचा अधिक तपास करत आहेत. (Latest Marathi News)