आयटी हब म्हणून ओळखल्या जाणाऱ्या पुण्यातील हिंजवडी परिसरात प्रेमसंबंधातून एका १८ वर्षीय तरुणीवर चाकू हल्ला झाल्याची धक्कादायक घटना घडली आहे. शनिवारी दुपारी ४.१५ च्या सुमारास साखरे वस्ती परिसरात घडलेल्या या हल्ल्यात तरुणी गंभीर जखमी झाली आहे. सध्या रुग्णालयात तिच्यावर उपचार सुरू आहेत. पोलिसांनी प्रियकर योगेश भालेराव, त्याचा मित्र प्रेम लक्ष्मण वाघमारे आणि एका अल्पवयीन साथीदाराला ताब्यात घेतले आहे.

हिंजवडी पोलिसांनी दिलेल्या माहितीनुसार, पीडित तरुणी आणि आरोपी योगेश भालेराव हे गेल्या काही महिन्यांपासून प्रेमसंबंधात होते. मात्र योगेश विवाहित असल्याचे नंतर समोर आले. त्याच्या पत्नीला या प्रकरणाची माहिती मिळाल्यानंतर ती नवऱ्याला सोडून घराबाहेर पडली होती. या घटनेनंतर योगेशने संबंधित तरुणीवर लग्नासाठी दबाव टाकला होता. परंतु तिने त्यास नकार दिला.

यानंतर तरुणीचे दुसऱ्या युवकासोबत संबंध असल्याची माहिती समजताच योगेशला राग आला. संतापाच्या भरात त्याने शनिवारी दुपारी आपल्या दोन साथीदारांसह साखरे वस्ती परिसरात पोहोचून चाकूने तरुणीवर वार केले. हल्ल्यात तिच्या हातावर, तोंडावर आणि इतर शरीराच्या भागांवर गंभीर इजा झाली.

घटनास्थळी उपस्थित नागरिकांनी जखमी तरुणीला तातडीने रुग्णालयात दाखल केले. पोलिसांनी सांगितले की तरुणीची प्रकृती सध्या स्थिर आहे आणि आरोपींना ताब्यात घेऊन त्यांच्यावर गुन्हा दाखल करण्यात आला आहे. या प्रकरणाचा पुढील तपास पोलिस आयुक्त कुन्हाडे आणि पोलिस निरीक्षक बालाजी पांढरे यांच्या मार्गदर्शनाखाली सुरू आहे.