पुणे शहर महापालिका निवडणुकीसाठी सर्व पक्षांनी तयारी सुरू केलीय. सगळ्या राजकीय पक्षांकडून इच्छुकांच्या मुलाखती घेतल्या जात आहेत. काँग्रेसनेसुद्धा पुणे शहरातील सर्वच प्रभागाच्या इच्छुक उमेदवारांच्या मुलाखती घेण्यास सुरुवात केली आहे. गेल्या दोन दिवसापासून पुण्यातील काँग्रेस भवन येथे महापालिकेच्या सर्व प्रभागातील इच्छुकांच्या उमेदवारीसाठी मुलाखती सुरू आहेत. मात्र यावेळी गद्दारांच्या मुद्द्यावरून काँग्रेस नेत्यांमध्ये तुफान राडा झाला.

उमेदवारीच्या मुलाखतीवेळी माजी नगरसेवकाने गोंधळ घातला. माजी नगरसेवक रफिक शेख यांना उमेदवारी हवीय. पण माजी नगरसेवक अविनाश बागवे यांनी त्यांना गद्दार म्हणून कडाडून विरोध केला. गद्दार लोकांना पक्षाने तिकीट देऊ नये, अशी मागणी अविनाश बागवे यांनी केलीय. रफिक शेख यांची भाजपशी जवळीक आहे असा आरोप करत बागवे यांनी रफिक शेख आणि भाजप नेत्यांचे काही फोटो सर्व काँग्रेस कार्यकर्त्यांना दाखवले.

इच्छुकांच्या मुलाखतीमध्ये पुणे शहरातील विविध भागातून आजी-माजी नगरसेवक तसेच पक्षातील अनेक पदाधिकारी आणि कार्यकर्ते मुलाखती देत आहेत. या मुलाखतीमध्ये काँग्रेसचे माजी नगरसेवक अविनाश बागवे हे सुद्धा उपस्थित होते. या मुलाखती दरम्यान अविनाश बागवे भलतेच संतपाले. यावेळी बोलताना अविनाश बागवे यांनी पक्षातील वरिष्ठांना सांगितलं की, गद्दारांना पक्षाने तिकीट देऊ नये. त्या पक्षाने त्यांना नगरसेवक म्हणून स्थान दिलं. पक्षात जबाबदारी दिली तेच मात्र दुसऱ्या पक्षात अनेकवेळा दिसतात.

अविनाश बागवे यांचा रोष काँग्रेसच्या माजी नगरसेवक रफिक शेख यांच्या विरोधात होता. बागवे यांनी बैठकीदरम्यान पक्षातील वरिष्ठ नेत्यांना रफिक शेख यांना उमेदवारी देऊ नका, कारण गेले पाच वर्ष भाजपाच्या मांडीला मांडी लावून ते बसत आहेत असे सांगत त्यांनी काही फोटो सुद्धा दाखवले. एका बाजूला काँग्रेसच्या ज्येष्ठ नेत्या प्रियंका गांधी या भाजप विरोधात लढा उभा करत आहेत. काँग्रेसमधील इतर वरिष्ठ लोकं आंदोलन करतात मात्र हे नगरसेवक चंद्रकांत पाटील यांच्या कार्यक्रमाला जाऊन हजेरी लावतात. अशा लोकांना आपण काय मदत करायची, असा सवाल सुद्धा यावेळी अविनाश बागवे यांनी विचारला.