Pune Accident News : दिवाळीतील फटक्यांच्या आतषबाजीमुळे पुण्यात भयंकर अपघात झालाय. दोव दुचाकीची समोरासमोर जोरदार धडक झाली. यामध्ये चार जण जखमी झाले आहेत. यामधील एकाची प्रकृती गंभीर आहे. जखमींवर उपचार सुरु आहेत. पुण्यात उरुळी कांचन ग्रामपंचायत हद्दीत शनिवारी सायंकाळी सव्वा सातच्या सुमारास हा अपघात झालाय. आज याचा व्हिडीओ समोर आलाय.

दिवाळीत काही मुले रस्त्यावर फटाके वाजवत होते. फटाक्यांमुळे संपूर्ण रस्त्यावर धूर झाला होता. या धुरामुळे दोन दुचाकींचा समोरासमोर अपघात झाला. या अपघातात चौघेजण जखमी झाले आहेत. एकजण गंभीर जखमी झाला असून चौघांवर वेगवेगळ्या खाजगी रुग्णालयात उपचार सुरू आहेत. चक्रधर संतोष कांचन, क्षितिज राहुल जाधव (वय- 18, रा. दोघेही उरुळी कांचन), सिद्धांत नवनाथ सातव (वय- 20) व प्रतीक संतोष साठे (वय- 20) असे अपघातात जखमी झालेल्या चौघांची नावे आहेत. यातील सिद्धांत सातव याच्या डोक्याला मार लागल्याने गंभीर जखमी झाला आहे.

रस्ता पूर्णपणे हा धुरमय झाला होता. त्यातून समोर काही दिसत नव्हते त्यातून हा अपघात झाला. एका दुकानाचे उद्घाटन सुरू होते त्यावेळी घटना घडली आहे. एका व्यक्तीने लांबून फटाक्यांचा व्हिडीओ काढत असताना अपघाताचा थरारक व्हिडीओ कॅमेऱ्यात कैद झाला. याप्रकरणी पोलिसांनी अद्याप कुणावरही कारवाई केलेली नाही.