Summary -

• नवले पुलावर कंटेनरला भीषण अपघात

• चालकाचे कंटेनरवरील नियंत्रण सुटले

• कंटेनरने १० ते १२ वाहनांना धडक दिली

• अपघातानंतर कंटेनरला आग

• अपघातामध्ये ८ जणांचा मृत्यू

पुण्यातील नवले पुलावर आज भयंकर अपघाताची घटना घडली. नवले पुलावर भरधाव कंटेनरने १० ते १२ वाहनांना जोरदार धडक दिली. कंटेनरने अनेक वाहनांना धडक दिल्यानंतर पेट घेतला. यावेळी अनेक वाहनांना देखील आग लागली. या अपघातामध्ये ८ जणांचा मृत्यू झाल्याची माहिती समोर आली आहे. पुणे- बंगळुरू महामार्गावर अपघाताची ही भयंकर घटना घडली.

या अपघातामध्ये अनेक जण गंभीर जखमी झाले आहेत. जखमींना उपचारासाठी रुग्णालयात दाखल करण्यात आले आहे. अपघातानंतर नवले पुलावर काचांचा ढीग, पेटलेली वाहनं, कारचा चुराडा झाल्याचे चित्र पाहायला मिळत आहे. सध्या पोलिस, स्थानिक नागरिक आणि अग्निशमन दलाकडून मदतकार्य आणि बचावकार्य युद्धपातळीवर सुरू आहे.

मिळालेल्या माहितीनुसार, पुण्यातील नवले पुलावर आज संध्याकाळी भीषण अपघात घडला. एका भरधाव कंटेनरने अनेक वाहनांना धडक देत एका ट्रकला धडक दिली. कंटेनरने कार, दुचाकी आणि ट्रक अशा १० ते १२ वाहनांना धडक दिली. या अपघातामध्ये वाहनांचा चक्काचूर झाला. हा अपघात इतका भीषण होता की त्यामध्ये ८ जणांचा दुर्दैवी मृत्यू झाला. अनेकांचा आगीमध्ये होरपळून अक्षरश: कोळसा झाला.

प्रत्यक्षदर्शीने दिलेल्या माहितीनुसार, साताराहून पुण्याच्या दिशेने हा कंटेनर येत होता. नवले पुलावरून खाली उतरत असताना चालकाचे कंटेनरवरील नियंत्रण सुटले. त्यानंतर या कंटेनरने समोर येईल त्या वाहनांना धडक दिली. या अपघातामुळे रस्त्यावर काचांचा ढीग पडला होता. पोलिसांनी घटनास्थळी धाव घेत जखमींना रुग्णालयात दाखल केले. तर मृतांचे मृतदेह शवविच्छेदनासाठी रुग्णालयात पाठवले. या अपघातामुळे पुणे- बंगळुरू महामार्गावर मोठी वाहतूक कोंडी झाली आहे.