पुण्यातून मोठी बातमी समोर आली आहे. जादा परताव्याचे आमिष दाखवून कोट्यवधींची फसवणूक करून ३ वर्ष फरार असलेल्या तरुणाला ताब्यात घेण्यात आले आहे. एपीएस वेल्थ व्हेंचर्स एलएलपी कंपनीचा संचालक अविनाश अर्जुन राठोडने जादा परताव्याचे आमिष दाखवून गुंतवणूकदारांची तब्बल ८८ कोटी रुपयांची फसवणूक केली. त्यांनंतर तो तीन वर्षे फरार होता. त्याला दुबईतून भारतात आणण्यात आले आहे. पुणे पोलिसांनी त्याला ताब्यात घेतल्यानंतर न्यायालयाने दहा दिवसांची पोलिस कोठडी सुनावली आहे.

पोलिसांनी दिलेल्या माहितीनुसार, एपीएस वेल्थ व्हेंचर्स एलएलपी कंपनीचा संचालक अविनाश अर्जुन राठोडने अनेक गुंतवणूकदारांना जादा परताव्याचे आमिष दाखवून तब्बल ८८ कोटी रुपयांची फसवणूक केली. या प्रकरणी एप्रिल २०२३ मध्ये पुण्यातील चतुःशृंगी पोलिस ठाण्यात गुन्हा दाखल झाला होता. त्यानंतर या गुन्ह्याचा तपास आर्थिक व सायबर गुन्हे शाखेकडे सोपवण्यात आला. तपासादरम्यान, अविनाश राठोड, त्याची पत्नी विशाखा राठोड आणि इतर साथीदारांनी बाणेर येथील एपीएस वेल्थ व्हेंचर्स एलएलपी कंपनीच्या माध्यमातून गुंतवणूकदारांना जादा परताव्याचे आश्वासन देत मोठ्या प्रमाणावर गुंतवणूक करण्यास प्रवृत्त केल्याचे समोर आले.

गुन्हा दाखल झाल्यानंतर अविनाश आणि विशाखा राठोड हे दोघेही परदेशात फरार झाले होते. त्यामुळे एप्रिल २०२४ मध्ये त्यांच्याविरोधात लुक आऊट नोटीस जारी करण्यात आली. विशेष एमपीआयडी न्यायालयाने अटक वॉरंट आणि जाहीर नोटीसही काढली होती. त्यानंतर जून २०२६ मध्ये दोघांविरोधात रेड कॉर्नर नोटीस जारी करण्यात आली.

या नोटिशीच्या आधारे यूएई प्रशासनाने अविनाश राठोड याला ताब्यात घेत २३ जुलै २०२६ रोजी भारतात प्रत्यार्पित केले. दरम्यान, या आर्थिक घोटाळ्यातील इतर आरोपींचा शोध सुरू असून, विदेशात पलायन केलेल्या सर्व आरोपींना कायदेशीर प्रक्रियेद्वारे भारतात आणण्यासाठी पुणे पोलिसांचे प्रयत्न सुरू आहेत.