सचिन जाधव, पुणे

पुण्यातून धक्कादायक बातमी समोर आली आहे. २ अल्पवयीन मुलींवर लैंगिक अत्याचार करण्यात आले आहेत. पती पासून विभक्त झाल्यानंतर निवाऱ्यासाठी प्रियकरासोबत राहणाऱ्या महिलेच्या या २ मुली आहेत. संबंधित तरुणानेच मुलींवर अत्याचार केला असल्याचे उघड झाले असून पीडित मुलीच्या आईने दिलेल्या तक्रारीनंतर आरोपी विरोधात पोक्सो कायद्यानुसार गुन्हा दाखल करण्यात आला आहे.

मिळालेल्या माहितीनुसार, तक्रारदार महिला पतीपासून विभक्त राहत असून तिला १५ आणि १४ वर्षाच्या दोन मुली आहेत. घटस्फोटानंतर राहत घर सोडून महिलेने निवासासाठी प्रियकरासोबत राहण्याचा निर्णय घेतला. त्यानंतर महिलेने तरुणासोबत सोबत राहणे सुरू केले होते. मात्र सदर महिला कामानिमित्त बाहेर असताना तरुणाने त्याचा गैरफायदा घेत तिच्या मुलींसोबत घाणेरडे कृत्य केले.

आरोपी तरुण मुलींना विविध कामाच्या निमित्ताने बोलवत होता. मालिश करून देण्याच्या नावाखाली त्यांनी दोन्ही मुलींची गैरप्रकार केल्याचे उघड झाले आहे. शिवाय धाकट्या मुलीवर अत्याचार करण्याचाही प्रयत्न केला असल्याचा आरोप आहे. घटनेची माहिती कोणाला दिल्यास वडिलांकडे परत पाठवण्याची धमकी देऊन आरोपींनी मुलींना गप्प बसवण्याचा प्रयत्न केला.

मात्र त्याचा हा प्रयत्न अयशस्वी ठरला. घाबरलेल्या पीडित मुलींनी आई घरी आल्यावर तिला घडलेला सगळा प्रकार सांगितला. या घटनेनंतर क्षणाचाही विलंब न करता महिलेने तरुणाविरोधात तक्रार दाखल केली. महिलेच्या तक्रारीनंतर विमानतळ पोलिसांनी गुन्हा दाखल करून आरोपीला ताब्यात घेतले असून त्याच्यावर पोक्सो अंतर्गत गुन्हा दाखल करण्यात आला आहे. दरम्यान पोलीस या घटनेचा सविस्तर तपास करत असून या घटनेने पुन्हा एकदा मुलींच्या सुरक्षितेतेवर प्रश्नचिन्ह निर्माण झाले आहे.