प्रशांत कोरटकरने छत्रपती शिवाजी महाराजांचा अवमान केल्याप्रकरणी वातावरण चांगलंच तापलंय... कोरटकरच्या तेलंगणातून मुसक्या आवळल्या असल्या तरी आता या प्रकरणी नवा ट्विस्ट आलाय... चिल्लर प्रशांत कोरटकरला काँग्रेस नेत्याच्या घरातून अटक केल्याचा गंभीर आरोप भाजपनं केलाय. तर मुख्यमंत्र्यांनीही अप्रत्यक्षरित्या काँग्रेसकडे बोट दाखवलंय.

फरार कोरटकर, पाप कुणाचं?

कोरटकरला कुणाच्या पक्षाने आश्रय दिला? असा सवाल मुख्यमंत्री देवेंद्र फडणवीस केला. तर भाजप आपलं पाप झाकण्यासाठी काँग्रेसवर आरोप करत असल्याचा पलटवार काँग्रेसनं केलाय. कोरटकरवर तोंड न उघडणारे काँग्रेसचं नाव घेत आहेत, असं काँग्रेस आमदार विजय वडेट्टीवरार म्हणाले.

प्रशांत कोरटकर नागपूरमधून पसार झाला. त्याला सत्ताधाऱ्यांनी मदत केली असल्याचा आरोप विरोधी पक्षाकडून करण्यात येत होता..आता भाजपने काँग्रेसकडे बोट दाखवलं असलं तरी खरंच शिवद्रोही कोरटकरला काँग्रेस नेत्यांनी मदत केली का? कोरटकर पोलिसांच्या गराड्यातून पसार झाला हे अपयश नेमकं कुणाचं? असे अनेक प्रश्न निर्माण झालेत.

त्यामुळे आता पोलीस तपासात कोरटकरच्या लपाछपीमागे नेमकं कोण होतं? याची सखोल चौकशी करायला हवी आणि मदत करणाऱ्यावरही कठोर कारवाई करायला हवी... तरच शिवद्रोहींना मदत करण्याची कुणाची हिंमत होणार नाही....